وبقيت أنا المديرة !

Sherine Ezzeldine Sherine Ezzeldine
مقالة Work Life Balance Coach تاريخ النشر : 1 month ago

وبقيت أنا المديرة !

فجأة لقيتى نفسك مسئولة عن بيت وتفاصيل كتير!
لو ملقناش فردة الشراب تبقى أنتي أكلتيها ولو مفيش غدا تبقى بتدلعي وتبدأي رحلة العذاب والإكتئاب ومش عارفة تبدأي منين ولا تعملي إيه والبيت أصبح مكركب وجوزك بيلومك وكمان معندكيش وقت لنفسك ولا بقيتي تهتمي بصحتك.

وتزيد الأزمة لما البيبي يشرف على هذا الوضع، فييجي يدمر اللي فاضل من صحتك وأعصابك ومن البيت ذات نفسه، ويا سلام لو كنتي بتشتغلي بأه أو عايزه تشتغلي ومش عارفه.
يا صغيرة على الهم يا لوزة...

وطبعا مخك يبدأ في سؤال نفسه: "أنا ايه اللي رماني على المر ده؟" ده أنا كنت حلوة وبراحتي وتلاقى المجتمع بيشدك ناحية إنك تبقى "Strong Independent" وان البيت والأسرة مش ضروري ومش لازم يحطموكي و إنك تقدري تعملي اللي أنتي عايزاه واللي مش عاجبه يتفلق.
الحل في الحبل.

فسعادتك يا بتحاولي تقنعي نفسك إنك بقرة مربوطة في الساقية ويا حرام مش عارفه تفك منه وتبدأي مرحلة الانهيار وتدمير النفس مع شوية رضا بالأمر الواقع، يا بتحاولي تقطعي الحبل وتتمردي وتنطلقي للسترونج اندبندنت وورلد وتضربي البيت والعيال صرمة وتشوفي أنتي عايزة إيه وتعمليه، وفى الحالتين للأسف بتخسري كتير، لأنك مشيتى عكس الطبيعة وعكس سنة الحياة وعكس التيار وعكس كل حاجة الصراحة.
كل ده كان ليه؟

للأسف لأن مجتمعنا أصبح ينقصه الكثير من التربية والكثير من الأخلاق والكثير من أبسط القواعد والأساسيات وحاجات تانية كدة، برضو أصبح ينقصه إنك تعرفي إيه دورك في الحياة وتحددي أهدافك صح، محدش قالك انك لازم تعملي ده قبل ما تتجوزي ودخلتي في دوامة:
- أنجح عشان أشتغل
- أشتغل عشان أتجوز
- أتجوز عشان أخلف
- أخلف عشان أوديه الحضانة وأرجع الشغل تاني.
كارثة بكل المقاييس!!

فكري كده بهدوء، أنا ربنا خلقني ليه؟ هل البيت ده ممكن يمشى من غيرك؟ (جوزك يطبخ ويغسل مثلا) هل تحبي حد غيرك يربى لك ولادك؟ (الناني – الحضانة - الأيباد).
أعرفي عزيزتى المكتئبة أن مسئولية البيت اللي أصبحت تقع عليكي دى شرف يتمناه الكثير ومش طايله ووظيفة عظيمة ربنا فضلك بها عن الرجل. اه والله .. وأعطاك القوة والعقل ان محدش يعرف يمشيها غيرك، بس اعرفي برضو ان الموضوع صعب لكن مش معناه انك حتلغي نفسك وحياتك وتحبسيها في دور مديرة البيت فقط، الموضوع بس محتاج شوية تنظيم.

1- تحددي أهدافك في الحياة: عايزة تبقى أيه، شكل أسرتك يكون ازاي؟، ولادك يطلعوا ايه؟
2- تنظمي وقتك وتخلى البيت كله يمشى بمواعيد لكل شيء.
3- تنظمي حاجتك وتخلى البيت كله برضو يمشى بمكان لكل شيء.
4- تحطي قواعد للبيت يمشى عليها الكل لأنك مش عايشة لوحدك ولا حتفضلي جنبهم للأبد
أنت مديرة البيت.

أنتي شخصية مهمة جدا ومؤثرة في حياة ناس كتير والناس دول المفروض أنهم أهم حاجة في حياتك. بيتعلموا منك مش بس تأكليهم وتلبسيهم.
تخيلي نفسك مديرة كبيرة في شركة عالمية كنتي حتقدري متركزيش في شغلك أو تسيبيه يغرق! ولا كنتي حتحاربي عشان ينجح ويتقدم؟

دي فرصتك ومشروع العمر تنجحي شركتك وتخليها المكان اللي بترتاحي فيه وتكون مثال لغيرك وتستمتعي فيه بكل النعم اللي ربنا ادهالك، ولو مش عارفة خليكي Professional زي أي مدير شاطر. خدى كورسات وطوري نفسك واتعلمي تبقي ازاي مديرة ناجحة.

© HUD Systems 2018