ليه انا تخين؟

Mai Shaaban Mai Shaaban
مقالة Fitness Coaching تاريخ النشر : 10 months ago

سؤال كتير ما بنسأله لنفسنا.

ليه انا تخين يعنى ليه مش عارف اخس؟

هو انا اقل من الناس اللي بتخس في ايه وليه انا وصلت كده اصلا؟

عاوز تعرف لية تعالى وتخيل معايا، تخيل صاحب عربية لما تقف ولمبة البنزين تنور يحطلها بنزين
لما تعطل يحطلها بنزين ولما تتخبط يحطلها بنزين ولو الانترية اتقطع يحطلها بنزين
ولو العجلة نامت يحطلها بنزين.

تخيلوا بقي لو كل ما نحط البنزين في العربية تكبر هنسوقها ازاي وهتبقي تقيلة قد اية علينا ليه بيعمل كده لأنه عنده احتياجات وهو مش واعي بالاحتياج ده ولا واعي ازاي يشبعه!

وكذلك كل انسان الأكل واخد عنده معاني اكتر من انه مجرد وسيله نتعايش بيها ونتبسط كمان ونحافظ على صحتنا، عنده احتياجات احتياج انه بيحقق ذاته انه متشاف انه مرتاح انه منتمي انه عنده تقدير لذاته غير مشروط، لما الاحتياجات دي مبتتلباش صح بنرجع نلبيها بأشكال غلط وابسط طريقه هو الأكل.

طريقه سهلة وحلال ومتاحة ومش متجرمة وسط الناس، فباكل وانا زعلان وانا فرحان وانا مضغوط وانا بحتفل وانا متوتر، ولما في جلسات الرشاقة بنطلع خريطة المتعة للأكل بيبقى على الاقل في 7 حالات للأكل غير الجوع والشبع. بس المفاجأة ان الاكل بيكون زي مسكن وكمان مبيسكنش الألم كويس وغالبا بيزوده.

طب والحل؟

الحل في الوعي انا دلوقتي هقوم اكل ليه؟ علشان جعان ولا علشان اي سبب تاني؟

طيب لو كلت دلوقتي هيتحقق لي اللي انا عاوزه؟ ولا هيكون مجرد مسكن؟

الوعي نص الحل اني باكل مش علشان اعيش انا باكل علشان ألبي احتياجات صح بطريقة غلط، بلبيها بطريقة هتزود احتياجاتي للرشاقه وللثقه في النفس وللصحة فبدل ما ألبيها هزودها.

طب والخطوة الجاية ايه؟

المقال القادم دمتم اصحاء رشقاء واعيين...

© HUD Systems 2018