ليه مش عارف اخس؟

Mai Shaaban Mai Shaaban
مقالة Fitness Coaching تاريخ النشر : 10 months ago

انا مين من غير الأكل اللي بحبه؟

سؤال على قد بساطته الا انه جواه معاني كتيره اوى، رغم اننا بنبقى عارفين احنا ليه وصلنا للوزن ده وعارفين كويس ان العادات دي بتضرنا وعارفين اننا ماشيين في سكة غلط وعارفين محتاجين نعمل ايه الا اننا بنختار بكامل ارادتنا اننا نكمل في الطريق اللي مش عاوزين نروح له، كأن قوة ما بتجبرنا اننا نعمل كده.

لما بسأل العملاء عندي السؤال ده بيطلع اجوبة مختلفة:

- انا من غير الأكل حاسس اني بفتقد حاجه مهمه.
- انا من غير الأكل محروم انا من غيره حاسس بإجبار.

طيب انت مين مع الأكل اللي بتحبه؟

انا انسان مبسوط فرحان مستمتع حر...، وهكذا.

فإنسان مسجل جوا عقله اني بحب الاكل وبستمتع بيه وهو مصدر السعاده، وانا من غيره محروم او حاسس بالفقد، مع اول احتياج مش ملبي هيحاول يعوضه باسهل حاجه ممكن تحسسك بالسعاده او الفرحة او الراحه ويطلعلك اول اختيار في القايمه هو الأكل "يللا يا حبيبي كل واستمتع".

طيب هل انت مبسوط فعلا والأكل مسيطر عليك؟
لأ

هل الأحتياج ده بيتلبي؟
لأ

احنا كبني ادمين بيحركنا حاجتين ملهومش تالت، الألم او المتعه، يا بنتحرك علشان نبعد عن ألم بنعاني منه، او بنتحرك علشان نروح لمتعة احنا عاوزينها.

فلو انت بيحركك انك عاوز تروح لمتعة بس انت مكبر متعة الأكل اوي في عينك ومصغر متعة الصحة والرشاقة والتحكم يوم ما متعة دول هيبقوا اكتر من متعة الأكل هتتحرك، ولو انت اللي بيحركك انك تبعد عن ألم يبقى انت شايف ألم انك تبعد عن الأكل الكتير اكبر من الألم اللي موجود حاليا في حياتك، يبقى بعد كل ده نقطه ومن اول السطر محتاج تدي كل حاجه حجمها الحقيقي وشوية اسئله اجابتها هتفرق كتير.

- انا من غير الأكل الكتير اللي باكله كسبان ايه؟

- انا بالأكل الكتير اللي باكله خسران ايه؟

- متعة الأكل المؤقتة احسن ولا متعة الصحة والرشاقة والقوة؟

- ألم اني اكل بس على قدي اكبر ولا الألم اللي انا عايشه حاليا؟

- انا مين من غير الأكل الكتير؟

وبعد ما تجاوب على الاسئلة دي حاجات كتير والادراك ده هيوديك للخطوة اللي بعدها في المقالة الجاية باذن الله.

ودلوقتي بعد ما جاوبت على الاسئلة ادركت ايه؟

© HUD Systems 2018