هتديني كام؟!

Ereeny Mourad Ereeny Mourad
مقالة Parenting Coaching تاريخ النشر : 3 months ago

أم دخلت كورس للأهالي و دار حديث بينها و بين الأمهات اللي حواليها عن هل لازم ادفع لابني مقابل خدماته في البيت؟
أمهات كتير كان رأيها "ايوه طبعا مكافأة" ، "بشجعه عشان بيساعدني" ، "بشجعها عشان نزلت اشترتلي".

الأم قالت "كان دا رأيي من أسبوع لكن الأسبوع ده حصل مع ولادي مواقف غريبة لما طلبت من ابني ينزل يجبلي حاجة من السوبر ماركت و كان رده هتدفعي كام!!
و لما طلبت من بنتي تغسل الأطباق و كان ردها اغسليها انتي يا ماما انا معايا فلوس كفاية مش محتاجة تاني، و لما فكرتها ان دي مهمتها ردت و قالت لا انت بتدفعيلي عشان اغسلهم!!"

أم تانيه ردت بأسف ان ولادها اشتغلوا في فترة الصيف و بعدها لما كانت بتطلب منهم مساعدتهم كان ردهم شغل الصيف بيجيب فلوس اكتر مش هشتغل في البيت تاني.

إيه رأيكوا في المكافآت المادية مقابل مساعدة ولادنا لينا في المهام المنزلية من تحضير اكل، تنظيف، اعمال شراء و غيرها..

الحقيقة ناس كتير بتعتبر انها بتشجع ولادها بالمقابل المادي و كمان بتدفعهم يحوشوا و يقدروا يشتروا اللي عايزينه لكن للأسف زي ما شفتوا ولاد الأم كان ردود فعلهم ايه؟! الحقيقة المهام المنزلية مهام كل أم و أب بيقوموا بيها بلا مقابل على الإطلاق لأنها ببساطة مسئوليتنا تجاه بيتنا و عيلتنا هي مش عمل بتقاضي عليه مقابل لكنه مهمة و مسئولية و في فرق كبير بين الاتنين.

ولادنا محتاجين يعرفوا ان زي ما كلنا بنشترك في مسئولية بيتنا، زي ما كلنا بنتشارك في ثروة بيتنا و دا بأنهم بيحصلوا على مصروف، المصروف مش واجب على كل أب و أم طالما بيقدموا احتياجات ولادهم من مأكل و ملبس و مشرب، لكنه مشاركه في دخل العيلة الشهري، و عشان كده لو في فرد من العيلة مش هيشارك في مسئولية و مهام المنزل مش من حقه يشارك في دخل الاسرة.

منظور جديد جايز.. لكنه حقيقة و اولادنا مش هيتعلموا يشيلوا مسئولية و يقدموا تضحيات لو كل مهمة بيخدوا في مقابلها فلوس او اي نوع أخر من الرشوات.

© HUD Systems 2019