إدمان الحلويات

Mai Shaaban Mai Shaaban
مقالة Fitness Coaching تاريخ النشر : 9 months ago

*الحلويات انا مقدرش ابطلها.

- لما بتاكل الحلويات بتحس بإيه؟

*طعم الحاجة المسكرة كده في بقي بيخليني مبسوط وملمسها الطري.

- يعني طعم السكر هو اللي بيبسطك؟

*جدا.

- طيب لو جبت علبة سكر وكلتها هتتبسط نفس الانبساط بالطعم المسكر.

*لا مش هقدر.

- يعني اللي بيبسطك طعم السكر ولا المعنى اللي انت مديه للحلويات.

*اممممم...

مشكلة إدمان الحلويات هي مشكلة معاني لان غالبا الحلويات مرتبطة معانا بالفرح او الاحتفال، او لما كنت تبقي زعلان ويقولولك خلاص متعيطش هنجيبلك حاجه حلوه، او مكافأة لما تعمل حاجه صح.

المعاني دي مع الوقت اتحولت لعادات مدمره للجسم وللنفس، وحقيقي بيبقي ألمها اكتر من نفعها لكن المعنى الراسخ بيغلب غالبا، وبعدها بيكون تخن وتعب وتأنيب ولوم للنفس، والأصعب ان المشكله الحقيقيه اللي بنهرب منها بالحلويات مبتتحلش، لأن ورا كل إدمان حاجه مشكله مختفيه محتاجه تتحل.

لو انت عندك مشكله إدمان الحلويات وفككتها لأصلها انها مجرد دقيق وسكر وزيت ودهون، وان الحاجات دي حقيقي مبتعملش سعادة حقيقيه دي مجرد مكونات بتطلع منتج وراها أذى كبير وتأنيب واحساس بالضعف وعدم السيطرة.

لو اديتها معناها الحقيقي مجرد حاجه طعمها حلو وبدل ما نمنعها خالص او نفتحها على البحري محتاجة تتقنن، وباقي الأيام لو الجسم احتاج احتياج حقيقي للسكريات في مصادر طبيعيه كتير تحقق الفايده وتجنبنا العواقب وتعيشنا في سلام.

كل حاجه مجرده مجرد مكونات لحد ما نديها معنى...

© HUD Systems 2018