علم ابنك الرجولة

Nancy Maher Nancy Maher
مقالة Parenting Coaching تاريخ النشر : 2 months ago

والمنطق دة علي الولد والبنت.

النهاردة عاوزة نفكر سوا في شوية مبادئ الرجولة:
1- الالتزام بالكلمة، واللي يوعد بيه يكون مدروس ومحسوب وفي حدود إمكانياته واللي يوعد يوفي بيه.
2- الاعتماد على نفسه، في زوجات كتير بتعاني من ان زوجها مش بيعرف حتى يعمل كوباية شاي وده بيبقى حمل زيادة عليها لأنها لو وقعت او تعبت مش بتلاقي حد يشيلها تماما.
3- يتعلم يدي وياخد مش ياخد بس طول الوقت: يعني في أزواج بيدور على شريكة حياة يعرف يستغلها طول الوقت، طاقة ومجهود وخدمة وكمان فلوس وفي ظروف الحياة الصعبة دة بيضغط جدا الزوجة ويخليها مستهلكة drained بمعنى الكلمة.
4- حسن التصرف، اولادنا وبناتنا لازم يتعلموا من صغرهم ازاي يدوروا علي حل لأي مشكلة تواجههم.
- ازاي يوصلوا لقرار صح بشكل واعي.
- ازاي يتعاملوا مع الناس اللي حواليهم سواء كانوا بيضايقوهم او بيستغلوهم او بيسخروا منهم، وهكذا...
لما تعلم ابنك ازاي يتصرف في كل موقف بحكمة ويطلع بأقل الخسائر الممكنة يطلع شخص واعي مش بيغرق في شبر ميه.
5- يعرف يحط حدود، اقصد هنا ازاي يقول لا وامتى ولمين من غير ما يخاف او يضعف.
6- الاحترام والحكمة في التعامل، مش العنف والعصبية والغضب.
7- المرونة في التعامل وفكرة قبول الرأي الآخر.
8- الاعتذار عند الخطأ وقبول العتاب والاعتراف بالخطأ.
9- المسئولية والشعور بالدور اللي المفروض يعمله بدءا من المذاكرة و الاخلاص في الشغل والمسئولية ناحية بيته وأسرته.
10- الحب بالفعل وليس بالكلام.
11- مشاعر الآخرين مش لعبة.
12- الحياة مش لازم تمشي سهلة من غير مشاكل بس بازم نعرف نحل المشاكل اول بأول وبنفسنا مش لازم حد يحلها لينا.
13- كل واحد ليه حمل معين وأمانة معينة ربنا حاطتها له وهيتحاسب عليها فعلموه الأمانة.
14- الثقة في النفس وانه مش اي حد يقوله حكم او كلام عنه يصدقه ومش كل حد يقوله تعالى جرب كذا او انت مش راجل لو معملتش كذا، ميأثرش على ثقته في نفسه ومش يخلوه يخوض اي طريق من غير تفكير وده هيساعده وقت المراهقة يتغلب على ضغط الأقران أو ال peer pressure.
15- التمسك بدينه دليل على الرجولة مش اي طريق تاني، خليه يحطها حلقة في ودنه.

ربنا يحافظ على اولادنا وبناتنا ويخليهم دايما يكونوا رجالا.

© HUD Systems 2019