هل عدم الحب سبب كافي للطلاق؟

Nancy Maher Nancy Maher
مقالة Relationship Coaching تاريخ النشر : 6 months ago

بقالي فترة طويلة عاوزة اتكلم في الموضوع ده والنهاردة آن الأوان أننا نناقش الموضوع ده سوا علشان جاتلي رسالة مهمة جدا:
"هل عدم الحب سبب كافي للطلاق؟"
الحقيقة الموضوع ده مهم جدا واللي احب اقولهولكوا النهاردة ان في الزواج في حاجات كتير اسمها معوقات الحب.

زي إيه؟!

1- وجود طرف تالت بكل أشكاله وصوره.
2- الكبرياء والعند وبخاصة من الزوجة.
3- السيطرة والتحكم وبخاصة من الزوج.
4- العنف الجسدي واللفظي.
5- الخيانة.
6- فقدان الألفة أو ما يسمى Rapport
7- عدم التواصل والخرس الزوجي.
8- عدم وضوح هدف العلاقة outcome
9- محاولة طرف واحد فقط لأنجاح العلاقة.
10- تكرار الازمات المتماثلة بين الزوجين.
11- وجود مشكلة في ترتيب الأولويات.
12- تأثير الامور المادية على نفسية الزوجين.
13- عدم التعبير عن الحب.
14- اختلاف لغات الحب بين الطرفين بشكل يؤثر تاثيرا سلبيا على صحة العلاقة.
وغيرها وغيرها من المعوقات...

طيب ايه علاقة ده بالسؤال؟!!

علشان أقولكو أن مفيش حاجة اسمها "أنا مبقتش بحبه" دي تقليعة وحجة بيخترعها ناس كتير رغبة في الانفصال والطلاق.
طيب أومال إيه اللي حصل؟
اللي حصل هو خلل وفقدان للرغبة في المحاولة مرارا وتكرارا علشان نوصل للهدف "اننا نعيش مبسوطين".
علشان كده الحالات اللي تابعتها عارفين ان عمري بسلم بالكلام ده وايأس واقولهم يالا اتطلقوا.
المشكلة اننا بقينا بنختار السكة السهلة لراحة البال اني انفصل افضل من اني احاول واتعب مخي، التفكير بيتعبني.
علشن كده قد تتفق وقد تختلف معايا في الكلام ده بس لازم نحاول تاني
نرجع الحب، لان الحب مش بيروح والدليل الcouples اللي بيرجعوا افضل بعد جلسات المشورة، خبرات الحب هي اللي بتطفي، اعملوا سوا او كل واحد لوحده قائمة كبيرة جدا بكل التفاصيل الصغيرة اللي بتضايقكو من بعض وكل المشاكل اللي بينكو وتتكلموا فيها وتصلحوا واحدة واحدة، واعملوا سوا خطة عمل.

دا انت لما بيكون عندك مشكلة في الشغل بتعصر مخك علشان تحلها فمابالك بحياتك كلها وحياة اولادك متستهلش منك شوية مجهود.
لان الحب يمكن إعادته بالعمل عليه يبقي نعمل حاجة زي checklist لكل المشاكل
ونمشي عليهم واحدة واحدة، ندرس الأسباب ونحلل النتائج، واتبع سياسة "اصبر وانتظر الثمر" وانا متأكدة وعن خبرة ان الباب لما يتفتح الحلول بتظهر والقلوب بتلين والحياة بتبقى افضل، وساعتها عمرنا ما هنفكر في الطلاق.
طبعا ده مع افتراض ان السبب هو فقدان الحب بس.

ربنا يملا قلوبنا حب وبيوتنا سلام...

© HUD Systems 2019