#مع_إني_ببرء_لهم_مابقاش_يهمهم

Amaal Attiah Amaal Attiah
مقالة Life Coaching تاريخ النشر : 9 months ago

١- ابنى عصبني وخاني التعبير وقلت له إنت شخص هتفضل طول عمرك فاشل ومتخلف، وعدى الموقف ، وقبل ما يروح ينام حضنته وقلت له أنا فخورة بيك اوى و بحبك جدا.

لقيته بيقولى إنت بتكذبي يامامى، وكده حرام.

ليه بتقول كده حبيبي😮 ؟

قالى إنت قلت لى الظهر كذا وكذا وكانت عينك مصدقة اللى بتقوليه كله، أنا مابقتش عارف أصدق حضنك ولا أصدق عينيكى؟☹

٢- طلبت من بنتي الصغيرة كوباية شاي، فرحت جدا بالطلب وعملتها على أكمل وجه، و شكرتها جدا .

لكني لاحظت إن نظراتها متبعاني مع كل مرة اشرب من الكوباية، نظرات متلهفة تشوف نظراتي معبرة عن إمتنان وشكر أكتر.

٣- في الكورس الأخير لما وجهت سؤال للحضور شايف صورتك الذهنية إزاى؟، جاوبتنى واحدة وقالت سؤال صعب جدا،

لأني عمرى ما شفت صورتي غير في عيون أهلي، واللى إترسم ليها في ذهنى كان بعيونهم بس.

٣ سيناريوهات بتحكي تفاصيل بسيطة لكلام العين بتحصل كل يوم فى حياتنا.

بسيطه آه لكن لو كل واحد فينا قعد يحكى عمره كله عن إن الكلمه بالعين دى أثرت فيه إزاى مش هيكفي.

على فكرة إنت أوفر اوى؟😤

صدقني لا ، إحنا مش حبينا بكلام العين؟

بنلوم وبنحتقر ونتجاهل بكلام العين؟

مش كلام كتير بيتقال ما بنصدقوش لو كلام العين قال عكسه؟

مش سكن جوانا حزن وفرح وذكريات كتيرة بس من كلام العين؟

يبقى ليه مصريين نستخدم مع ولادنا النظرة الخبيثة، بدل النظرة الطيبة؟

ليه مش بنستخدمها غير في التهديد والوعيد؟

لدرجة إنى بشوف آباء وأمهات بنظرة ممكن يخلوا الطفل يفقد روحه وتحسه شايل هم الدنيا لمجرد إنه عارف هيحصل له إيه فى البيت.

ليه برغم إننا عانينا عمر بسبب النظرة المرعبة دى مصريين نكرر الرعب ده لولادنا ؟

و مستائين جدا إنها مابقتش بتجني ثمارها وبنكرر ( ده ماما كانت بتبص لنا النظرة دى كنا بنموت، دلوقتى العيال مابقاش يهمهم).

ليه بقينا بنحضن بعنينا الموبايلات والآلات أكتر منهم، وبعد كده نقول مافيش وقت؟

أسئلة مهمة محتاجين نسالها لنفسنا كل يوم.

إجابتها هتسهل علينا مشوار كبيير في طريق التربية المجهد جدا .

إجابتها هتدربنا نحضنهم بعنينا لو المسافات فرقتنا بحكم الظروف.

حضن يحفر جواهم نظرة حنان زى البصمة مهما يدوروا في ألف عين وعين عمرهم ما هيلاقوا زيها .

حضن هنطمن نفسنا بيه لما ندرك إن الوقت اللى بقينا معاهم فيه ما بقاش كفاية.

حقيقي إننا في الزمن الصعب، لكن صدقوني كلام العين من أهم الحاجات اللى بتهون صعوبته.

و في النهاية أتمنى أكون قدرت اقدم لكم في المقال كبسولة سريعة تدخل السعادة لقلوبكم ، و سند بسيط في دنيا مليانه بالأعباء.

#ببساطه_اوووووى
#امال_عطيه

© HUD Systems 2019