ارحموهم

Amaal Attiah Amaal Attiah
مقالة Life Coaching تاريخ النشر : 9 months ago

( الشهر ده جت لي ٣ حالات محتاجين تأهيل نفسي نتيجة لتعرضهم لمحاولة إنتحار فاشلة .😯

أيووووووووه، زى ما إنتم بتقرأوا كده، و المفاجاءة الأكبر ، إن أعمارهم بتترواح مابين ١١ و١٩ .😓

ودار بينا بشكل تقريبي الحوار التالي ،زى ما تقولوا كده لخصت لكم الحوارات اللى دارت في الجلسة:-

أنا:- أهلا وسهلا بيك ياحبيبى أنا مبسوطة أوى إنك طلبت إنك تروح لحد علشان يزبط لك نفسيتك, حقيقي فخورة بيك إنك عندك الوعي ده.

هو:- مع إبتسامة مهزومة ورأس مطأطأة شكرا, بس أنا طلبت أجي لك علشان عندي هم على قلبي وحبيت أخلص منه مع حد ما يعرفنيش.

أنا:- بنظرة مليانة إعجاب بفكره العميق, برافو إتفضل.

وفي حالة أخرى :- 😕 بنظرة مليانة قرف , لا أنا أصلا ما كنتش عايزة أجي, وجاية غصب عني لما أشوف يمكن ألاقي عندك جديد.

و بعد مناهدة طويلة جدا، ومحاولات مستميتة لإقناعهم بالفضفضة بدون اى محظورات، قالوا كلام كتير وسردوا مشاكل كبيرة أوى على سنهم ووصفوا تأثيرها عليهم لكنهم كلهم اجتمعوا على الجملة دى:-

(و يومها بس قررت أخلص من حياتي) .

وبعدها 😯 و في كل مرة بيقولوها كأن زلزال بيهزني من جوه, وبحاول أتحكم في عدم ظهوره حتى بالنظرة, مع تركيز شديد ممزوج بحالة من الذهول من ملامحهم اللى مليانه طفولة وبراءة وكأنهم أطفال لم يصلوا لسن المراهقة ،وجوايا صوت واحد إزاى يعملوا كده، وفعلا بحس بعجز رهيييببب؟.

بعدها بحاول لملمت نفسي و مواجهتهم بسؤال ، مهما يكون اللى حصل إيه اللى يخلي حياتك رخيصة أوى كده بالنسبة لك ؟, مع إني أهلكم قالوا لي إنكم فيكم حاجات كتير حلوة , ليه وصلتوا للمرحلة دى؟😔

الجميع :- لأني برغم كل اللى قالوه ومهما أبذل مجهود لإرضائهم، لسه مش عاجبهم ،لسة بيزعلوا مني,لسة بيحزنوا بسبب غلطاتي, لسة بيزهقوني ملامة وتقطيم, لسة بيحاسبوني حساب عسير ، لسة بيراقبوني برغم إني بحاول أكون صريح معاهم حتى ولو غلطت، لسة لما بيقعدوا في قاعدة مش بيتكلموا عني غير بالسلب، فقررت أريحهم مني خالص، وأريح نفسي من قرفهم، لأني فعلا مش شايف لنفسي لازمة إنها تعيش.

والجميع أجمع على جملة واحدة( في اللحظة اللى قررت فيها أنتحر ، أنا تقريبا بكون غايب عن الوعي، مش أنا اللى بعمل كده) 😢.

وحقيقي الحالات دى حزنت بسببهم جدا، مع إن مش اول مرة تيجي لي حالة زى كده ، بس اللى خلا الدنيا ضاقت كده هو إنهم لسه ما شفوش حاجة، وحسيت إن فعلا الفجوة كبرت أوى بينا وبين الجيل ده، ولو ملحقناش وضيقناها فعلا هندفع تمن يمكن ما نلاقيش عندنا حاجة ندفعها قصاده .

وبدأت أوجه لنفسي أسئلة؟😢

• طيب الحالات اللى حصل لها كده وما إتكتبش ليها عمر جديد؟

• طيب اللى إتكتب لهم عمر وأهلهم خافوا يقولوا وتعاملوا مع الموضوع على إنه تجربة وعدت, وماحطوش إحتمالية تكراره مرة تانية؟

• طيب هنفضل لحد إمته ما بنحاولش نفهم نفسية ولادنا, ولو فهمناها إمته هنفوق إنهم مش هينفع يبقوا صورة كربونية لمزاجنا وتوقعاتنا ؟

• لحد إمته هنفضل مصريين على جملة إن ده المفروض, وإنهم لازم يكونوا محترمين علشان خاطر الناس؟.

• لحد إمته هنفضل مش واخدين بالنا إن كلمة (المفروض) دي إتلغت في عقول ولادنا وما ينفعش نكررها لأن بالنسبة لهم بقت سجن مهما كانت بتتقال وراها مصلحتهم.

•إمته هيجي الوقت اللي نرحمهم فيه من الجلد على سبب تافه أو سبب كبير كله زى بعضه,المهم ننتقد وخلاص عايزينهم مايغلطوش ولا غلطة, سواء بالقول أو الفعل، و كأننا لحد النهاردة عايشين أنبياء؟

• لحد إمته هيفضلوا يسمعوا من أبوهم بيقول لأمهم جملة إنتِ السبب فى كل اللى بيحصل ده ، ده بسبب دلعك ليهم ياهانم ، بعد كل غلطة منهم؟.

أو هى تنهار وتصرخ وتقول هسيب لكم البيت وأطفش منكم ، أوانتم أكبر غلطة فى حياتى؟

• لحد إمته هنفضل نحصر معنى النجاح والتفوق في حاجة واحدة، وهي بس اللى لو اتحققت بيشوفوا نظرة الرضا اللى بيستنوها، غير كده مش هيحلموا بيها وكأن الإحتواء والحب له شرط مثلا؟

#و_أنا_بتكلم_مع_نفسي_صدمتها

جابوا على الأسئلة دى أرجوكم بمنتهى الصدق, وفوقوا للزمن والوقت والإعلام والسوشيال ميديا اللى سرق مننا تأثير التربية السليمة، وحددوا هدفكم العام من التربية, وراجعوا حسابتكم, وبطلوا تبرروا لقسوتكم وكلامكم اللى بيكون عليهم أشد من الضرب بحجة عايزنهم أحسن ناس.
#ارحمهوهم يرحمكم الله.
#ببساطه_اووووى

وأشوفكم في مقال جديد، مقال هقول لكم فيه إزاى نرحمهم , مقال يخلينا سند لبعض فى دنيا مليانة بالاعباء.
#سلام_عليكم
#امال_عطيه

© HUD Systems 2019