هذا انت

Hanady Mostafa Hanady Mostafa
مقالة Life Coaching تاريخ النشر : 1 year ago

(اللهم انك عفو كريم تحب العفو فاعف عنا)

لما حضرنا أمسية فلكية كانت مفاجأة ليا إنى اعرف أننا مش بنشوف غير وجه واحد للقمر دايماً.

ايه ده بجد!!!

و ده ليه علاقة بمكان وجودنا على الكرة الأرضية، يعني الناس اللى في الجزء الشمالي من الكرة الأرضية دايما بيشوفوا نفس الوجه و الناس اللي فى الجزء الجنوبي بيشوفوا نفس الوجه، و ده علشان القمر ليه دورة زي دورة الأرض كدة فعقبال ما يلف و يرجعلنا تاني بيرجع بنفس الوجه.

حلو جداً .. عايزة ايه يعني ؟!

انت .. زي القمر 😉

ليك أطوار و أوجه، زي القمر بالظبط 🌝

ساعات تبقى محاق 🌚 (قمر وليد يعني) نوره جواه موجود بس لسة مانعكسش على الارض، زيك، نورك موجود جواك بس لسة مفيش طاقة يطلع لبرة و ينعكس و يفيض.

ساعات تبقى هلال 🌒 .. طاقتك و النور اللي جواك يا دوب يمشيك حتة حتة صغيرة.

و ساعات يبقى أحدب 🌔 يعنى كله منور .. إلا حتة .. ناقص حتة .. في عز الفرحة تفتكر الحتة الناقصة.

و ساعات تبقى بدر منور 🌕 .. كامل و مدور و عالى في السما .. تشوفه العيون و تعرفه، و ممكن يمشى فى هداه الناس و يتعلموا منه و يعرفوا مكانهم منه .. ما هو بدر فى تمامه.

و بعدين يرجع تانى يبقى ليه أطوار مختلفة!

مرض النفس هنا إنك تكلبش في حالة و تطالب نفسك تفضل على الحال ده على طول، ظلم، ظلم بين كمان انك بتطالبها إنها تفضل على طول بدر منورة و مدورة و عالية في السما من غير ما تريح و لا تتغير و لا تتعلم و لا تفصل، يا راجل ده التلاجة بتفصل! انت مش عايز نفسك تفصل شوية!!!

او العكس، بتحبسها و تحجمها و كل ما تيجى تشم نفسها، تكبتها و تكتمها و تفكرها إنها محاق مش من حقها تطلع نورها براها، و مش بس كدة! لا تعجبك الحالة فا تبدأ تطلعلها مميزات ان طول ما انت مطفي مفيش عليك مسئولية، محدش حيطالبك بحاجة .. مش حتعمل حاجة .. فا مش حتغلط.

يا ترى انت في انهي حال دلوقتى؟

و يا ترى سايب نفسك تاخد دورتها كاملة و لا حابسها في ناحية معينة و بعدين بتشتكي؟!

لسة للكلام ده بقية إن شاء الله...

© HUD Systems 2019