فى بيتنا مراهق

Marwa Morsi Marwa Morsi
مقالة Parenting Coaching تاريخ النشر : 1 year ago

#في_بيتنا_مراهق
كتير مننا عنده مراهق يسكن بيته... إذا كان أم .. أب ...أخ ...
المراهقة في الزمن الحالي بسبب كمية المعلومات الكبيرة اللي بتوصل للاولاد بدري بتبدأ من 9 سنين ...
وبتدرج حدة المراهقة في شدتها وعنفها من شخص لاخر ومن بيت لبيت ....
المراهقة تغير الهرمونات والافكار والتمرد والهايبرة... والرفض والعنف ... والانفعالات الغير منطقية ...
التطرف في المشاعر والافكار .....تغيرات هرمونية ونفسية وجسدية وشخصية ....
رغبة في الاستقلال وتقلبات مزاجية وتغيرات سلوكية ....
المرحلة دي مش بتبقي صعبة علي الأب والأم بس .... دي الاصعب علي المراهق نفسه .... لأنه هو نفسه بيبقي في حالة من التوهان والتوتر وعدم الاتزان والخوف والاندفاع وكل المشاعر المختلطة...
المرور بسلام من المرحلة دي محتاحة حكمة ونضج واستيعاب وادراك كامل من الاب والام ....
أولاً : فتش ورا سبب السلوك .... السلوك بسبب شعور ... والشعور وراه فكرة ...ابحث عن اساس الفكرة ...
ثانياً: حافظوا كآباء وامهات علي الهدوء وثبات الموقف لان التغيير اللي بيمر بيه المراهق مش سهل عليه نهائي ومحتاج طرف متفهم للاحساس دة...
ثالثاً: وانت بتتكلم مع ابنك او بنتك ركز علي السلوك مش علي شخصيته ... متقولش انت همجي ... انت فاشل ... قول انت محتاج تتعلم... ترتب وقتك اكتر ... انت محتاج تحاول بشكل مختلف ...
رابعاً: مكافئة السلوك المميز ودة بننساه لاننا دايما بنركز علي الوحش وعايزينه يتصلح ومش بناخد بالنا نعزز السلوك الجيد وندعمه ...
خامساً: الوقت دة المراهق بيحاول يدور علي المثل الاعلي حاول تساعده ان يلاقي دة وياريت لو تكون إنت.....
سادساً: عدم فرضية إنهم عارفين الصح من الغلط ...نتكلم بكل صراحة ووضوح في كل الجوانب وكل الموضوعات واللي ممكن انها تكون بتتصف بالخجل في مناقشتها ... اكسر الحاجز دة مع ابنك وبنتك ....
سابعاً: متبخلوش بوقتكم مع اولادكم والمهم هو جودة الوقت مش طول المدة ... اديهم اللي محتاجينه في اقل وقت ...
ثامناً: لازم تحترموا خصوصيتهم ... وتسمحولهم بمساحة شخصية ملائمة فمن حقهم يقضوا وقت لوحدهم بالقدر المعقول ....
تاسعاً: عبروا عن حبكم ليهم الوقت دة بيبقوا محتاجين للحب....فعشان ميلجأوش لاشباع الحب من برة حاولوا تشبعوهم بحبكم واحتوائكم ....
عاشراً : لازم وضع حدود واضحة للتعامل وتوضيح الحقوق والواجبات لكل فرد في الاسرة دة حيدعم المسئولية ومعناها في شخصيتهم...
الحادي عشر: لازم نسمع لهم كويس ولازم ناخد آرائهم في أمور البيت والاسرة واستشارتهم في الأمور اللي تخص العائلة لان دة بيدعم الانتماء والاهمية لوجودهم وبيديهم ثقة في نفسهم كبيرة....
الثاني عشر: روح الدعابة في التعليق علي سلوكيات غير مقبولة بيساعد جداً علي تعديلها بهدوء وبدون عِند...
الثالث عشر: حتلجأوا للتفاوض معظم الوقت لأن فرض الاوامر والقواعد لن يفيد.....
الرابع عشر: المراقبة بدون ما يشعروا نهائي....نهائي ...نهائي...
الخامس عشر :صاحبوهم ....صاحبوهم ....صاحبوهم

© HUD Systems 2019