متبقاش زي الفيل

Rania Shoukry Rania Shoukry
مقالة Relationship Coaching تاريخ النشر : 1 year ago

واحد استغرب اوي ازاي الفيل مبيحاولش يهرب من حديقة الحيوانات رغم انه ممسوك بحبل صغير جدا في رجل واحدة وممكن بسهولة يقطعه ويهرب.
راح سأل الحارس فقاله ان الفيل بيتربط بالحبل ده وهو صغير ورجله لسه صغيرة.
فلما كان بيحاول يهرب مكانش بيعرف ولما كبر فضل مصدق انه ميقدرش يهرب رغم ان جسمه كبر ومكانش حتي بيحاول يجرب.

يا تري احنا كمان ممكن تجاربنا واحنا صغيرين وفشلها علمتنا قلة الحيلة والعجز المزيف زي الفيل؟

ممكن تكون معتقداتنا القديمة مخليانا مصدقين عجزنا ومانعانا حتي نحاول نثبت كدبها؟

كام واحد فينا مصدق انه فاشل في حاجة وميقدرش ينجح فيها علشان كان بيتقاله " انت متقدرش" ؟؟
كام واحد مصدق انه "ميستاهلش يتحب" علشان كل الرسايل اللي كانت بتوصله بتقول وتأكد ده ؟؟
فصدق ده وبقي ياخد اي تجربة رفض علي انها شيء طبيعي يحصله وبقي عنده استعداد يتحمل علاقات مؤذية لأنه شايف انه ميستاهلش غير كده؟؟

يا تري ايه الحبل اللي مقيد بيه نفسك ومخليك واقف في مكانك ومش شايف ان فيه حاجة ممكن تغير وضعك ده؟؟؟
أنت اصلا مش عارف امكانية وجودها ومسلم بحالك زي الفيل اللي صدق ان الحبل اللي منعه يهرب زمان لسه مانعه بعد ما كبر وبقي ضخم ويقدر بسهولة يتحرر منه.

انت كمان كبرت وعرفت ان اللي كان موقفك زمان ممكن جدا يكون اختفي دلوقتي.
انت نفسك مبقتش نفس الشخص ، كبرت ووعيت ومريت بتجارب. اكيد لو ابتديت وراجعت القيود اللي ساجن فيها نفسك وحاولت تفكها ، النتيجة هتختلف تماما.
#رانياشكري

© HUD Systems 2019