#إدمان_الحزن

Amaal Attiah Amaal Attiah
مقالة Life Coaching تاريخ النشر : 10 months ago

( وبعدكلام كتير وعياط كتير قالت لى :- أنا بقيت شايفة كل الدنيا لون واحد, أنا حزينة, أنا بقيت حتى بكره ولادى وزوجي اللى كل الناس بتقول عليهم المفروض يكونوا سبب سعادتي لأنهم مسببين ليا عبء, المفروض إنى أبقى كويسة علشانهم وأضحك وأبسط علشانهم, وأنا مش عايزة أكون غير كده, زوجى بيتهمنى إنى نكدية وخميرة عكننة ومش مقدر اللى مريت بيه في حياتي ووصلنى لكده, ولما بقعد مع نفسي بلاقي الحاضر مفهوش حاجة وحشة لكني مش عارفة أكون غير بالمشاعر دى).

وبعد رحلة من البحث داخلها, قلت لها اسمح لى أقولك إنك مدمنة حزن.

ايه ده؟ هو في حزن بيدمن ؟🙁

طبعا أى شعور ممكن يدمن, وهتعرفي ده لما نفهم أولا يعنى إيه إدمان؟

#ببساطه_اووووى هو استخدام مادة أو نوع من السلوك بيسبب لنا من وجهة نظرنا تهدئة وراحة بشكل أو بآخر، وبنهرب بيه من مشاعر عدم الارتياح اللى حاسيين بيها ، و بيبقى المدمن بيستمر فى استخدام مخدره اللى إختاره غصب عنه برغم إنه عارف أن النتيجة مش هتبستطه غير فترة لحظية و في أوقات كتير بيجلد ذاته بعدها.

طب يعنى إيه إدمان الحزن؟

يعنى موقف حصل في حياتي حزنت بسببه, و لكن مش حزن إستمر فترة وبتقل حدته مع الوقت ولكن حزن عشت بيه لدرجة خلتنى أنفصل عن الواقع تماما وأعيش بالمشاعر دى بقية حياتي , وما تكلمش غير عليها, وما فكرش غير فيها, فمابقتش شايف اى حاجة حلوة مهما تكون فعلا حلوة, وحتى لو بدأت أقتنع إنها حلوة ببدأ أفكر فى الوحش اللى جاى وأستناه لدرجة إنى كنت بتكلم مع حالة قالت لى ( أنا دلوقتى ببقى منتظرة البلاء اللى جاى ), بل منهم اللى بيستغرب إن كل حاجة ماشية صح لو الدنيا بدأت تتظبط معاه, لحد ما تحصل الحاجة الوحشة فيبدأ يحس إن ده الطبيعي.
بيلقى الشخص لا عارف يفرح بإبن، ولا جواز بنت, ولا نجاح شغل, بقت روحه متيبسه, وكأنها صحراء قاحلة مهما شربت ميه لسة الجفاف مأثر عليها.

طيب أعمل إيه علشان أمر بعملية الإنسحاب من قناعة إن الحزن بقى سيد الموقف في حياتي؟

1- جيب أجندة وقلم, وابدأ اكتب الحاجات اللى المفروض إنها نِعم , زى مثلا متجوز ,عندك ولاد, صحتك كويسة, مش بتتعالج وبتدوخ على دكاترة وبتصرف على مرض,................... وهكذا.

2- بعدها ابدأ تخيل حياتك لو النعم دى مش موجوده فيها, ولو إنت مش عندك التخيل عالى ممكن تدور على أشخاص حواليك وتقعد تسمع شكوتهم فى النقط دى, اوتروح تزور مستشفيات.

3- بعدها كل موقف يحصل لك مفترض إنه يفرح ,حتى ولو ضحكة ضحكتها بسبب نكته, اكتبه وسجله فى أجندتك دى, ومن كده هتعلم نفسك ازاى تشوف الحاجات الصغيرة الحلوة اللى غيرك محروم منها.

4- كل إنجاز تعمله اكتبه في أجندتك بردوا, حتى ولو كان الإنجاز إنك طبطبت على حد أو ضحكت فى وشه, ومن هنا هتعلم نفسك تشوف إنجازات بسيطة تزود من قيمتها مع الوقت.

5- صاحب القرآن و اطمن لكلام الله فيه, واكتب كل الآيات اللى بتتكلم عن الحزن وازاى إن الأنبياء عليهم السلام بدعائهم هون الله عليهم آلالام نفسية لا تحتمل.

6- كفاية بقى تقول صعب ومش هقدر وتعبت, رمضان بكل تفاصيله بيثبت لك ان كل العوائق اللى حابس نفسك فيها طلعت فنكوش, كل اللى محتاجة إنك تركز علشان تدرك المعاني اللى بتدخلها على عقلك اللاوعى.

7- وأخيرا كرر على عقلك كل الإيجابي اللى كتبته زى ماكررت عليه الحزن اللى قابلته, هتلاقيه واحدة واحدة بيقتنع لحد ما نفسك تصل إلى مرحلة النضوج, بعدها هتتعامل مع الحزن والفرح كرحلة مسيرها إلى زوال بحلوها ومرها.

ولو ما قدرتش تعمل ده لوحدك لازم تلجأ لمتخصص ياخد بإيدك لبداية الطريق .
وأشوفكم الأسبوع الجاى في #بيت_جديد مع نوع إدمان جديد معظمنا مدمنينه وبنتعامل معاه بمعانى كتيرة كلها بعيدة عن معنى الإدمان, فتايهين في دوامة مش عارفين نخرج منها لأننا مش حاطين ايدينا على السبب الحقيقي.
#سلام_عليكم
#لسه_في_فرصة_للتعافي_من_الإدمان_بس_اديها_لنفسك
#امال_عطيه

© HUD Systems 2019