#إدمان_الأشخاص

Amaal Attiah Amaal Attiah
مقالة Relationship Coaching تاريخ النشر : 1 year ago

سيدة في مقتبل العمر مظهرها بيقول إنها واثقة في نفسها وشخصية قوية , ولكن عينها وهجها مطفي ومليانه حكايات من الألم والهم.

أنا:- اتفضلي
هي:-( بوجه صارم) أنا جاية علشان تقوليلي أعمل إيه علشان أخلي زوجي يفضل يفكر فيّ 24 ساعة, عايزاه مايشفش غيري , عايزاه يفكر فيّ وهو نايم وهو صاحي وفي كل لحظة, عايزاه يتنفسني زى ما أنا بتنفسه كده.
أنا:- بس أنت شايفة إن في حاجة أو حباية سحرية ممكن تحقق ده؟
هي:- أكيد لا, بس زى ما بتقولي بالتدريب كل حاجة هتتحقق.
أنا:- طيب إنت شايفة إنك شخصيا تقدري تعملي اللى بتطلبيه ده؟

هي:- أنا فعلا ما بعملش غير ده علشان كده محتاجة أحس إني بالنسبة له كده, أنا بجد مش بعرف أعيش غير وهو معايا, حتى ولو فى أحلى مكان في العالم مع أصحابي أو أهلي بلاقيني مش عارفة أتبسط بردوا, لو بات مرة برة البيت بسبب شغله لايمكن أنام لحد مايجي, مجرد تخيلي أنه ممكن يكلم زميلته في الشغل أو اى واحدة يعجب بيها ممكن أموت, أنا بدعي في صلاتي إن أموت قبله لأني فعلا عمري ما هعرف أعيش من غيره, هو نقطة ضعفي الوحيدة في الحياة .
بس اللى بيصعب عليّ منه إنه مش مقدر كل ده, بالعكس سهل جدا عنده إنه يزعلني برغم علمه بكل حاجة بتزعلني, بحسه بيتعمد يعمل كده بيتبسط بوجعي, سهل عليه جدا إنه يهيني بأبشع الألفاظ برغم إنه عارف إن كلمة منه ممكن تحييني وكلمة منه تموتني.

كزا مرة يمد إيده عليّ, وكزا مرة اكتشفت خيانته ليّ, وفي كل مرة فيهم بقرر أنسحب من حياته بس ما بقدرش أبدا, نفسي أكتسب مهارة أن أخد موقف معاه, لكن الهم اللى يضحك إن بعد كل وجع منه بكلمة واحدة برجع له ولا اكن حاجة حصلت, مش بس كلمة ده ممكن إبتسامة بس والله.
هو مصلحتي وراحتى وسعادتي وحياتي ما بتمشيش غير ليه وبيه, طول الوقت ببرر لأخطائة اللى ما بتخلصش, وبخلق لنفسى أعذار بل ساعات بَغَلّط نفسي علشان يرضى يرجع معايا زى الأول او ما خسروش, ما بقدرش أشتكى منه لحد ولو عملت كده بأنب ضميري،ساعات بشوف وجوده معايا نكد وعبء لكن بردوا متمسكة بيه, ساعات بوصل لمرحلة إنى جبت أخري وعايزة أنسحب لكن وقت التنفيذ بنهار وأضعف وأخلق أسباب علشان ما نفذش ده .
أعمل إيه ساعدينى أرجوكي، طيب ممكن حتى تقوليلى اعرف اخد حقي واعامله وحش زى ما بيعاملني بلاش إزاى يحبنى.☹

أنا:- اهدى بس، هنوصل لحل أكيد، بس الأكيد الحل تنفيذه صعب وفي إيدك إنت بس، مبدئياً كده اسمح لي قبل ما نقول العلاج نشخص المرض.
أنت ياسيدتي مدمنة، كل اللى وصفتيه هو وصف تفصيلي لمعنى الإدمان.
هي:- إدمان ؟
أنا:- أيوة مدمنة زوجك, والدراسات الحديثة بتقول لو كنت قريتي مقالي اللى فات إنه زيك زى مدمن المخدرات بل أصعب ,وبما انك بتعاني من الادمان لازم تعرفي إنك هتمري بعملية إنسحاب يوم ما تقرري تتحرري، و ده اللى بيحصل لك لما بتقرري تخرجيه من حياتك بتحسي بآلالام ونور حياتك كله بيطفي ، وجسديا بتنهاري وده اللى إنت مش بتستحمليه فبترحعي برغم سوء معاملته اللى أنهك روحك وكرهك في الدنيا.

طيب إيه اللي بيوصلنا لكده؟🙁
1- إما لأننا عانينا من حرمان عاطفي طول حياتنا والشخص ده هو اللى أشبع الشعور ده عندنا.
2- أو لأننا متعوديين اننا نغدق مشاعرنا بإفراط لأى حد نقرر نحبه بمعنى إن ده معنى الحب اللى في عقلنا الباطن.
3- أو لأننا فقدنا شعور الأمان وهو عوّضه من وجهة نظرنا.

طيب نخرج من دايرة العذاب دى إزاى😔؟
١- إبداى راجعي معاني السند والحب والامان والرجل في عقلك الباطن و إتأكدى إن معناها صح .
٢- اسمعي واقراى عن ناس كان مبدأهم في الحياة مستحيل يعيشوا من غير اللى بيحبوهم مهما حصل منهم ولكن وجدوا نفسهم كسبوا أكتر لما نضجت مشاعرهم، علشان يبدأ عقلك يتقبل الفكرة لأن تقبله للفكرة هى بداية علشان تقوي على أخذ موقف إن لزم الأمر.
٣-قيمة ذاتك مش من حُبه ليك، قيمة ذاتك لأنك إنسان كرمه الله عز وجل مش عايش الا علشان يعبد الله لا شريك له ما يعبدش اشخاص.
٤-لما الموقف يحصل راجعيه وأكنك بتتفرجى عليه من بره ، بمعنى خلي عندك شجاعة إنك تقولي لنفسك إنه غلطان وانت مالكيش ذنب في المشكلة .
٥-دربي نفسك إنك تستقلي عنه، الحاجة اللى ينفع تعمليها لوحدك إعمليها وقرري تستمتعي بيها ، علشان تشوفي قيمة لذاتك بعيد عنه بإنجازك ده.
٦-فين جوانب حياتك التانية؟ راجعيها كده بالورقة والقلم هتلاقيها كلها ضاعت علشان جانب واحد بس ،فعلشان كده فقدت إتزانك وبتدوري في فلك غيرك.
٧-إبداي رجعي علاقاتك الناجحة مع اهلك وصديقاتك اللى فقدتيها علشان خاطره، علشان تعودى نفسك تستنشق الحب والإهتمام من غيره مش منه بس.
٨- اوعى تقللي من اى سلوك غير لائق يعمله معاك، لازم تقفي وتحاسبيه او تصعدي الموقف لو التطاول زاد عن الحد.
٩- ما تخافيش إنك تخسريه، لان القاعدة بتقول الخوف الشديد من خسارة الحاجة هيخلينا نخسرها بطريقة او باخرى.
١٠-هو ما وقفش دنيته عليكِ، إنت جزء من الحياة مش الحياة كلها وده لانه شخص ناضج عاطفيا مش علشان ما بقاش يحبك او زهق منك، بس النغمة دى حقيقي خلته زهق منك.
١١- كل واحد فينا ليه طريقة في الحب فافهمي من بين السطور طريقته او إساليه سؤال مباشر وده على حسب طبيعته.
١٢- مافيش حد هيكسر زنزانة في يوم وليلة لو قرر يكسرها، الموضوع هياخد وقت على حسب صلابة الزنزانة دى، وده افضل كتير من لو فضل محبوس جواها طول العمر.
١٣- سجلي في أجندة إنجازاتك كل طوبة تكسريها من الزنزانة دى، وركزى إن التكسير يكون بشكل علمي مش عشوائي.
١٤- ما تتفرجيش على تركي كتير علشان مافيش كده.

وأخيرا المقال من وحي جلسات كتيرة بتدور كلها في المضمون ده ،
والمقال ينفع تطبيق خطواته للرجال اللى بيعانوا من إدمان زوجاتهم، او اى شخص بيعاني من إدمان وجود أشخاص في حياته مهما كلفه الامر.

وأشوفكم مع نوع إدمان جديد معظمنا مدمنينه وبنتعامل معاه بمعانى كتيرة كلها بعيدة عن معنى الإدمان, فتايهين في دوامة مش عارفين نخرج منها لأننا مش حاطين ايدينا على السبب الحقيقي.
#سلام_عليكم
#لسه_في_فرصة_للتعافي_من_الإدمان_بس_اديها_لنفسك
#امال_عطيه

© HUD Systems 2019