#إدمان_الكذب

Amaal Attiah Amaal Attiah
مقالة Life Coaching تاريخ النشر : 1 year ago

وبعد كلام كتير وشكاوى أكتر منه فاجئني :- سيدتي حابب أعترف لك بإعتراف أثقل صدرى سنوات وسنوات.
اتفضل🙂

أنا كذبت عليك في كل اللى بشتكي منه، أنا رجل ما بعرفش اعيش غير بالكذب، بحس إني لو ما كدبتش هتعرى قدام الناس، حتى أقرب الناس لى بقيت بكذب عليهم ، كلام الحب اللى بقوله لمراتي كله كذب ، جاي اشتكى لك من الكذب إخترت اكذب بردوا، ولكن أنا تعبت ، تعبت لأني عايش مهدد لأنى أصبح لى وضعي فى المجتمع، فبقيت اضطر إن الكذبة تدخلني في كذبة علشان أعالج الموقف ، وللأسف تعبي بيزيد من الصدمة اللى بشوفها في عين اللى إكتشف كذبه من كذباتي وبعد شوية بنسى وأعيد الكَرة.
كل شى بالنسبة لي مبرر ومباح مادام في كذبة هتخرجنى منها، كل المشاعر مستباحة مادام في كذبة هتبرر لى إستباحتها.
أنا بعترف إنى بقيت بتنفس كذب، وبعترف إنى بقيت بكره نفسي وبحتقرها ومش قادر اعمل اى حاجة غير الكذب.

حابة أنا بقى أعترف لك بحاجة وهي إن إنت بتعانى من نوع من الإدمان ألا وهو #إدمان_الكذب نوع بيدفع تمنه الجاني والضحية، ولكن في رايى ان التمن اللى بيدفعه الجاني أقوى بكتير وأعظم ما يدفعه هو أن يكتب عند الله كذابا.
مبدئيا خلينا نعرف إيه الأسباب اللى ممكن تكون وصلتك لكده؟

• الخوف من العقاب والتأنيب المفرط في تربيتك فما كنتش شايف غير الكذب ملاذ لتجنب ده.
• حرمان عاطفي مريت بيه وتجاهل لوجودك مما إضطرك للفت الإنتباه بقصص وأحاديث كلها كذب لحد ما بقت عادة.
• واقع مؤلم عشته ماكنتش عايز تعيشه فرسمت حياة في خيالك وبدأت تصدقها وتحكيها.
• لقيت في الكذب الوسيلة الوحيدة اللى بتخليك تاخد اللى إنت عايزه من اى حد وبفتح لك اى باب.

طيب أعمل إيه علشان أتخلص من العادة دى☹😔؟

• اولا لازم تعرف إن الأسباب دى ممكن تكون منفصلة او مجتمعة فكل اللى محتاجة تقعد مع نفسك بورقة وقلم، و تعمل فلاش باك وتشوف البداية كانت فين، أصل الازمة دى كان فين ومين السبب فيها من اللى قلناه؟
• إبدأ اعترف بالمشكلة وتقبل وجودها ما تهربش منها وتستخدم حيل علشان نفسك ما تتألمش من المواجهة دى، تقبل ألم المواجهة فترة مؤقته علشان نعالج.
• برافو عليك اعترفت بالمشكلة، وأدركت سببها؟ إنت كده مشيت مشوار كبير.
خد بقى القرار إن اول ما تاخد بالك إنك بتكذب ، هتغير الكلام وتقول الحقيقة بشطارتك المعهودة في الهروب من الموقف.
• الإعتراف والإعتذار بشكل مباشر او غير مباشر لحظة انتباهك إنك بتكذب ودى أحسن حاجة هتخلي الكذب يتسحب منك واحدة واحدة ، لانك مش هتبقى عايز تحس بالشعور ولا النظرات اللى بتتوجه لك تانى.
• لما تتهاجم من حد، عرفه إنك معترف بده وانت دلوقتى بتتخلص من عادة كان سببها كذا وكذا ،ولو يقدر يساعدك ويشجعك اطلب منه ده ، طبعا ده في حالة إكتشاف امرك سواء الكذبة قديمة او حديثة، المهم إنت تكون صادق فعلا مش كذبة جديدة بطريقة اذكى علشان تكتسب تعاطف وتخرج من الموضوع .
أما بقى لو ما قدرتش على كل ده فلازم تلجأ لحد متخصص وثقة يحطك على اول الطريق، واللى يهون عليك صعوبة الرحلة اللى هتمشيها فى العلاج هو حمد الله على إنك أدركت مشكلتك وبقت تسبب لك ألم نفسي نبهك علشان تفوق ، لأن غيرك عايش بيتلذذ بكذبه وبيتجاهل كل الآثار النفسية عليه وعلى غيره و ولا اكنه بيعمل حاجة.

وأخيرا حابة أختم بحاجة إن الفشخرة الكذابة لازم نعتبرها نوع من أنواع الكذب بيخلينا نظهر عكس ما إحنا حاسيين، بتخلينا ننبسط بالصورة اللى إحنا بنمثل بيها قدام الناس، لكن بعد فترة من النفخة الكذابة بنقع وبيكون ده تأثيره النفسي مدمر بالنسبة لنا و توابع ده أظن بنعانى منها كلنا.
أما بقى اللى بيعاني من وجود الشخص ده في حياته، لو شايف إن الشخص يستاهل تتعب معاه، او الإنفصال عنه مستحيل ، تعامل معاه على إنه حالة مرضية، واوعى تصدقه فى اى حاجة بعد كده، مهما كان مقنع، هى دى الوسيلة الوحيدة اللى هتخفف حدة الألم اللى سببه ليك واللى عانيت منه سنين، و ابدا ركز في حياتك وما تصدقش اى وعود ممكن يقدمهالك.

طبعا مش محتاجة اكرر صعوبة التنفيذ ولكنها مش مستحيلة، وبأكد إن المقال من #وحي_الجلسات.

و أشوفكم مع نوع إدمان جديد معظمنا مدمنينه وبنتعامل معاه بمعانى كتيرة كلها بعيدة عن معنى الإدمان, فتايهين في دوامة مش عارفين نخرج منها لأننا مش حاطين ايدينا على السبب الحقيقي.
#لسه_في_فرصة_للتعافي_من_الإدمان_بس_اديها_لنفسك
#سلام_عليكم
#امال_عطيه

© HUD Systems 2019