احساس الأمان

Rania Shoukry Rania Shoukry
مقالة Relationship Coaching تاريخ النشر : 1 year ago

رجل اعمال ، كان هيفلس وشركاته هتترهن وكل اللي عمله في حياته كان بيخسره ،
من يأسه راح مكان قدام نهر ،كان متعود يقعد عليه وهو صغير ، وهو قاعد لقي راجل كبير في السن لابس بدلة شيك جدا وباين عليه انه حد من الاثرياء ،
الراجل العجوز قاله " انا كنت قاعد هناك واخدت بالي انك حزين ، لو محتاج تحكي لحد اللي جواك ، انا ممكن اسمعك "
رجل الاعمال حكاله كل مشاكله المادية وازاي انه خلاص هيعلن افلاسه.
الراجل العجوز سكت شوية ، وبعدين طلع دفتر شيكات بمبلغ كبير جدا واداه لرجل الاعمال وقاله " انا فلان الفلاني ( رجل الاعمال استغرب علشان اللي ادامه ده اغني حد في المدينة اللي عايش فيها)
قاله ،انا كنت زيك كده ، مريت بأزمات مادية كتيرة في حياتي لحد ما وصلت للي وصلتله وانا هساعدك تطلع من أزمتك ، استخدم الفلوس اللي في الشيك دي وقابلني هنا بعد سنة وردلي الفلوس بعد ما تقف علي رجلك تاني.
رجل الاعمال مصدقش نفسه .
اخد الشيك وقرر انه ميصرفش الشيك وحطه في البنك وبينه وبين نفسه قال انه هيشتغل انه يرجع البيزنس بتاعه علي رجله تاني ولو حصل حاجه ومعرفش ، هياخد الفلوس اللي في للشيك ويتصرف.
فعلا قدر ،انه ياخد ،مشاريع جديدة ويعوض خسارته وحتي لما كان بيحصله مشاكل ، مكانش بيخاف لإن الشيك موجود في البنك .
بعد سنه وفي الميعاد ، اخد معاه الشيك بتاع الراجل الغني وشيك تاني فيه مبلغ منه علشان يشكره علي المساعده بتاعته.
راح المكان وقعد مع الراجل وقبل ما يديله الشيك ، لقي واحدة لابسة لبس ممرضة جاية عليهم وهي بتكلم الراجل الغني انه ييجي معاها وبتعتذر لراجل الاعمال
وبتسأله " هو ضايقك ، اصل هو مريض نفسي في المستشفي اللي هناك دي وكتير بيهرب ويقابل الناس ويقولهم انه الشخص الفلاني الغني"
الراجل اكتشف انه طول الوقت ده ، كان حاطط شيك من غير رصيد في البنك وكان مطمن انه معاه فلوس. الاهم من ده ، ان تصديقه ده خلاه يرجع يشتغل تاني علي شغله .

هل يا تري الانسان بيحتاج تطمين ولو مزيف من جواه علشان يصدق انه يقدر؟؟؟ ، هل ثقتك في نفسك وفي قدراتك ممكن تتجلي من غير ما تحتاج عامل أمان خارجي؟؟؟.
محتاج تصدق. انك تقدر بجد.
هل ينفع انك تخلي الامان ده نابع من جواك. الراجل مكانش معاه شيك حقيقي بس هو كان مصدق ، مجرد تصديقه خلاه يرجع كل شغله تاني وينجح من تاني.
هنا ييجي دور اليقين الحقيقي ، الايمان انك تقدر تقف تاني بعد ما وقعت من غير ما تحتاج حد او حاجة تقولك الكلام ده علشان تصدق ده عن نفسك.

#رانياشكري

© HUD Systems 2019