نسختك القديمة

Marwa Morsi Marwa Morsi
مقالة Relationship Coaching تاريخ النشر : 1 year ago

#نسختك_القديمة
كلنا بنمر بالوقت العصيب .. المميت .. القاتل ... وقت الغلط والمعصية.. وقت الحاجة اللي مش صح ... وقت الغضب وردود الافعال الغير محسوبة ...
وقت عدم الاتزان والاضطراب النفسي الشديد ... وقت التمرد والرفض ...وقت القرارات العشوائية ...
كلنا بنمر بكدة ... بدرجات مختلفة وصور مختلفة وتأثير مختلف ... بتنساق ليها وممكن تبقي مدمن .. عاصي ... كداب ... حرامي ... إوصل إلي أقصي الدرجات الممكن توصلها من الغلط ....

وأياً كانت المدة اسبوع .. شهر .. سنة .. .. بتيجي اللحظة وتقول بس كفاية ...
حاقف مكاني واعيد حسابات نفسي ...
وربنا يعينك .. وتبدأ وتنضف ...
ربك يقبل توبتك ...لكن دة مش حيسمح بيه البشر ...
وانت واقف مكانك بيكون ساند عليك كتير ... حركة منك معناها انهم يقعوا .. مهما كان قربهم .. مهما كنت انت في وضع سئ .. ثباتك مكانك معناه ثباتهم وأمانهم ... يوم ما تفكر تتحرك خطوة لقدام أو تغير مكانك ... محدش حيسمحلك بكدة ..

بعض منهم حيشوهك .. حيشكك في تغييرك .. حيفكرك بماضيك ... حيلوثك ... حيحاول بكل طاقته تفضل مكانك ... ولو حتي يقتلك .. أهو حيضمن يسند علي جثتك ...
والبعض التاني حيحاربك ... حيقلل منك .. حيقول انك مزيف غير حقيقي .. لأن مجرد نجاحك بيعني فشله ... المكان اللي وصلتله بقت كلمة مستحيل مش لايقة عليه ... نجاحك بيأكد فشله وقلة حيلته ... كمية الغل والحقد للي انت بتوصله بيثبت اد ايه هو عنده خلل داخلي فيبقي انت لازم تبقي مزيف مش حقيقي وتفضل مكانك والكل يعرف انك مسيرك ترجع لنسختك القديمة السيئة وان كل اللي انت فيه دة غير صحيح...

لكن الحقيقة ان كل دة مؤقت ... اثبت .. استعن بالله ... هو وحده اللي عالم إنت مزيف والا لا ...
هو وحده اللي عارف القوة اللي انت محتاجها ... عشان تواجه المحاولات دي لازم تكون عندك قناعة مهمة ...
إن نسختك القديمة بكل اللي فيها انت وحدك المسئول عنها .... انت وحدك اللي عارف هي حصلت ازاي وليه ... اما نسختك الجديدة فانت مسئول علي تقويتها والثبات عليها مهما كانت الظروف ومهما كانت التحديات ...
لان كل ما كانت التحديات اعلي ...كل ما كان دة معناه إن نسختك الجديدة عالية وغالية وليها قيمة ....ومحتاجة منك مجهود للحفاظ عليها...
اثبت ... استعن بالله ...
#بنت_مرسي

© HUD Systems 2019