الانطباعات الأولى تدوم

Umr Ezz Umr Ezz
مقالة Relationship Coaching تاريخ النشر : 1 year ago

الجواب بيبان من عنوانه
او الانطباعات الأولى تدوم
مقولة خاطئة ويناقضها الواقع والصواب

الانطباعات الأولى تؤثر ولكنها لا تدوم
والانسان دائما يبنى على اخر تجربة
لو كانت الانطباعات الأولى تدوم فلماذا اذن يأتي الكره بعد الحب أو يأتي الحب بعد الكره؟؟؟؟
أو يترك رجلا عملا كان يحبه أو ترى امرأة ان الحياة مع هذا الرجل لا تطاق؟؟؟

اخر لقاء هو الذي يبنى عليه ما بعده
ليس مقصودا باخر لقاء بمعنى اخر لقاء تماماً
ولكن كل مرة ترى فيها هذا الشخص تحدث أشياء جديدة اما ان تكون حسنة او تكون سيئة
ان كانت حسنة فالانطباعات ستكون جيدة وان كانت سيئة فأكيد الانطباعات سيئة
نكمل المقال بالعامية أحسن........

نستفيد ايه من القاعدة دي
نستفيد ان احنا منحكمش على قصة من مشهد واحد بس بل نحكم عليها من أكثر من موقف ومشهد
ومنتسرعش في الحكم على شخص من موقف لان الاحكام المتسرعة غالبا ما بيندم عليها الشخص بعد فترة
يعنى لو جالك واحد البيت عشان يتقدملك لأول مرة
وكان جي شكله على سنجة عشرة وجايب معاه حاجة في ايده غاليه جدا مش معناه انه شاب شيك وجدع ومعاه فلوس
وبرضه لو جالك واحد تانى اول مرة وكان مبهدل ومش جايب حاجة في ايده مش معناها انه شاب ندل وبخيل وبيئة او مش معاه فلوس
ممكن يكون الاولانى بيمثل والتانى مش عارف يتصرف او حصله ظروف خلت منظره كده ومعرفش يؤجل الميعاد
برده لو هي اتضايقت او اتبسطت فهى عندها حق
مش معنى انها متحكمش على حد من اول مرة انها متضايقش او تتبسط
وبرده نفس الكلام بالنسبة للرجل اللى رايح يخطب لو حسيت انها قمر 14 في اول مرة او حسيت انها اوحش ست في الدنيا من اول مرة
اوعا تحكم من اول مرة بس
لازم تروح تانى وتالت لغاية ما تتطمن وتتأكد ان قرارك ده صح وان البنت دي هتنفعك او مستحيل تنفعك
بس في حاجت منقدرش نتغاضى عنها بمعنى
لما سأل الرسول صلى الله عليه وسلم أي النساء خير؟ قال: التي تسره إذا نظر، وتطيعه إذا أمر، ولا تخالفه في نفسها وماله بما يكره.
هاستشهد حاليا من قول رسول الله صلى الله عليه وسلم (التي تسره إذا نظر)
على فكرة في فرق كبير بين إذا نظر اليها سرته او إذا نظر اليها بهرته
المشكلة ان كتير من الشباب بيدور على الانبهار اكتر من السرور
وغالبا اللى بيدور على كده من الشباب بيتجوز جوازة عادية جدا بس بيكون سنه كبر وعجز

خلاصته لو هي فيها حاجه انت فعلا مستحيل تقبلها فيها شكلا وموضوعاً يعنى هتضايق جدا لو هي فيها الحاجة دي يبقى نصيحة متكملش لأنك هتظلمها معاك
يعنى انت بتكرة البنت البيضاء او السمراء
او بتكره البنت الطويلة او البنت القصيرة
فبلاش تكمل واسأل على الحاجات دي قبل ما تروح البيت أحسن
مالوش لازمة تروح بيت وانت متعرفش الشكل اللى بتدور عليه
وحضرتك برده نفس الكلام لو انتى بتكرهي شكل الولد البناتى او الولد الأبيض او الأسمر او بتكرهي الولد الاصلع او الطخين او الرفيع
برده نصيحة متكمليش لان على فكرة دي حياة وعشرة عمر
يعنى الحاجات دي هتفضل مضيقاكي او مضايقاك بقية عمرك
انا كده خلصت اول نصيحة وهاكمل تانى في مقالات تانيه

© HUD Systems 2019