انت مش انت وانت مش غلطان !

Lamiaa Elkhateeb Lamiaa Elkhateeb
مقالة Parenting Coaching تاريخ النشر : 8 months ago

انت مش انت وانت مش غلطان ! :)

الخطأ من اكتر الحاجات اللي بتسبب نزاعات بين الاهل والطفل..
رغم ان الخطأ طبيعه بشرية لا تكتمل بشريتنا من دونها
رغم ان الخطأ فرصة مهمه جدا لينا وللاطفال اننا نتعلم منها
رغم ان الخطأ مرحلة طبيعية في حياتنا لأن من غيره المواقف في حياتنا هتكون ممله وشبه بعضها ....

عدم قبول الخطأ فينا وفي اطفالنا من اكتر الافكار السلبية اللي بتعطل تطويرنا وتغيرنا
فإن طفلي يغلط ده امر طبيعي محتاج اقبله ومحتاج اساعده انه الغلط اللي غلطه ده فرصة يتعلم منه حاجه جديدة..بدل ما اتجه اني اعنفه وازعق له لدرجة تخليه يكره الغلط اللي هي طبيعه فيه وبالتالي يكره طبيعته وقبوله لنفسه يقل،
وفطرته السليمه اللي هو جاي بيها للدنيا يبدأ يشك فيها ويحس انه غير مقبول لو غلط وبالتالي كل حركة بيعملها تكون مليانه بالخوف من انه يغلط ،

والخوف من الغلط هيخليه يعمل حاجتين :
1- اما انه يتحرك بحذر شديد ده بيخلي خطوته اللي بيتحرك بيها مليانه بالشك وبقلة الثقه في نفسه فمبيقدرش يكون نفسه الحقيقية ويبدأ يتنازل عن افكار ويلبس ماسك الملتزم اللي مبيغلطش عشان ياخد قبول واهتمام من اللي حواليه ولو غلط هيحاول يداري ويخبي او يكدب من كتر خوفه.

2- اما انه ميتحركش ويفضل واقف ومستني دايما غيره يحركه وهنا بيكون وصل لمرحلة انه مش واثق في روحه تماما لدرجة انه مش عايز يسمع لها لانه متأكد انها مش هتساعده فبالتالي بيستنى من اللي قدامه يحركة عشان ميتحملش هو مسؤلية الغلط ده ويتخلي عن مسؤليته تجاه نفسه.

والنقطتين دول من اكتر المشاكل اللي بتأثر على حياتنا قدام وبتفضل معانا لحد ما نكبر وبتسبب أذى نفسي لينا وللي حوالينا.....
وكل ده بيحصل لمجرد بس اننا بنعنف اطفالنا لما يغلطوا...تخيلوا بنعنف اطفالنا لما يعيشوا طبيعتهم وفطرتهم اللي الغلط جزء منها...

الخوف من الغلط طبيعه تقبلها في طفلك وساعد طفلك يتقبلها في روحه :)
خليه يعيش طبيعته زي ما هي لان ربنا خلق جواه فطرة سليمه تساعده يعيش ويتعلم دورنا بس في حياته اننا نساعده يثبت الفطرة دي ويعيش بيها ....
والغلط فطرة جوانا فبلاش نحارب الغلط لاننا كده هنبقى بنحارب الفطرة اللي بيها بنقدر نتعايش مع اللي حوالينا ونكون اسوياء نفسيا
فخليك نفسك وخليك انت بكل ما فيك من خطأ وساعد طفلك يكون نفسه واعرف انك "انت مش انت وانت مش غلطان" .... ساعد طفلك يكون نفسه

اشتغل بياع خير....وخد مرتبك سعادة

© HUD Systems 2019