هو وهي

Asmaa Saeed Asmaa Saeed
مقالة Relationship Coaching تاريخ النشر : 2 years ago

لو مقبله على الجواز يبقا لازم تكوني سمعتي النصايح العشرومية في كيفية إختيار الزوج اللولبي الفضائي اللي مفيش منه اتنين اللي تقولك إتجوزي الحنين واللي تقولك لاء الحنين ده بلاش منه لا يبقا مسهوك وبعد الجواز متعرفيش تلاحقي على البنات اللي حواليه واللي تقولك اتجوزي ابو عيون زرقا علشان عيالك واللي تقولك بلاش ابو عين زرقا ده بقا بالذات بصباص ومالوش أمان واللي تقولك امه تبقا في بلد وانتي في بلد واللي تقولك بلاش أخو البنات وغيرهم وغيرهم .. وهو كمان ياما قالولوا إتجوز دي وبلاش تتجوز دي ..

وبعد الجواز وبعد شهر العسل ما فات تبدء الخناقات أصله أتغير مكنش كده وهو يرد إنتي اللي إتغيرتي !

الحقيقة ان محدش منهم إتغير لا هو ولا هى أومال ايه اللي حصل ..

** هو وهى بنوا الجوازة كلها على أراء الناس اللي حواليهم والمجتمع في الزوج اللي المفروض انه يبقا زوج مثالي وهى كمان نفس الشئ ..

تعالوا نبسطها أكتر .. هو لما جه يتجوز تفتكروا هو فكر هو شخصياً محتاج إيه من العلاقة دي ، مع العلم ان إحتياجه ده ممكن يكون مختلف جداً عن إحتياج محمد صاحبه اللي متربيين مع بعض وصحاب منKG1 ، مهما كنا صحاب وقريبن جدا من بعض كل واحد فينا ليه إحتياج مختلف عن التاني الإحتياجات لإننا ببساطة مفيش حد فينا شبه التاني ،،

الإحتياجات دي نقدر نحددها ونقسمها مبدئياً لـست إحتياجات ..

- إحتياجاتي العاطفية

- إحتياجاتي الفكرية

- إحتياجاتي الروحانية

- إحتياجاتي الإجتماعية

- إحتياجاتي المالية

- إحتياجاتي الجسدية (الجنسية)

لو دخلنا اي علاقة و إحنا واعيين بإحنا عايزين منها إيه أكيد هنقلل كتير من توقعتنا اللي معظمها مبيتحققش ، وهنسهل الطريق كتير على الطرف التاني ازاي يسعدنا ..

وللحديث بقيه

© HUD Systems 2019