#إدمان_السعى_للكمال

Amaal Attiah Amaal Attiah
مقالة Life Coaching تاريخ النشر : 1 month ago

نوع إدمان مهم بقى معظمنا بيعاني منه, بقى من الأسباب اللى مخليانا مضغوطين وزهقانين ومش حاسين بأي حاجة حلوة.
النوع ده بالذات ضيع مننا وقت كتيييييييييييييير اوى, كنا فاكرين إننا بنعمل حاجة, لأ كنا فعلا بنعمل بس من كتر ما ضغطنا على نفسنا بإن كل حاجة فى نفس الوقت لازم تكون 100% صح, سبنا كل الأهداف اللى حطينها
لأننا حلمنا بالمستحيل وإحنا لسة بنبتدى و في النهاية طلعت المحصلة صفر.

بسببه بقينا بنسعى نكون أحسن حاجة , أحسن شقة , أحسن مدارس , أحسن براندات, أحسن عربيات, وبقت الجملة دى هي محور حياتنا والهدف اللى بنسعى له طول الوقت (أحسن حاجة).
ومع إن الهدف العام شكلة حلو لكن مضمونه مليان , إحباط ويأس , ومزاج سئ طول الوقت , وأفكار سلبية , وخوف مفرط من الفشل ,ودنيا مالهاش طعم ، وانجازات كل الناس شايفينها الا صاحبها، مليان ضغط وحزن وحقد .
وحتى لما بنوصل للأحسن بتكون فرحته لحظية وندور على الأحسن.

دوامة مملة مرهقة أنهكتنا لدرجة لا توصف.
واسمها دوامة ...
لأن لو ماتحققش (الأحسن حاجة ده) لنفضل حاسين بالنقص وإننا ولا حاجة و مفيش منطقة وسط بالنسبة لنا, ويبدأ بعدها جلد الذات وكلمة (لو).

والحقيقة اللي باوصفه ده نقطة في بحر من الألم النفسي اللى أصحاب النوع ده حاسين بيه.
يعنى إنتي عايزة تقولى إن كل غلطتنا اننا عايزين كل حاجة تمشى صح ؟😏

شعرة رقيقة جدا بتفصل ما بين السعي للأفضل (الطموح) ومابين السعي للكمال :
النوع الأول أصحابه متقبلين الألم النفسي والإخفاقات
والنوع التاني عايزين الدنيا بدون أى خسارة وأى ألم نفسي.

فيأيها الساعي للكمال, أظنك عرفت دلوقتى إن الدوامة دى وصلتك للشئ اللي بتهرب منه

يبقى يا صديقي نقطة ومن أول السطر ...
وبداية السطر هو أن تتقبل إن الألم النفسي جزء من الحياة, ولكن اللى هيخفف حدته هو نظرتك وفكرك - زى ما بنقول - في كل مرة.
ولازم تفهم إن (السعى الى الكمال) هو في الحقيقة عائق أساسي في تحقيق اى هدف .
إنك تعرف ان ربنا فى كتابه قال (وأعدوا لهم ما استطعتم من قوة......الايه) يعنى اللى تقدروا عليه, والآية دي نزلت في إيه؟ في الحرب. مش فى الحياة العادية.

لازم تعرف ان مفيش حد بيبقى جامد جدا اول ما بيبدأ
لازم لكل حاجة ممارسة وتدريب,وتدريج فى نفس الوقت
لازم أى خطوة جديدة ليها رهبتها
لازم هتلاقي حاقدين
لازم هتتكعبل

فتقبل بشريتك يا صديقي واتعلم من كل خطوة وكل شخص سواء كانوا إيجابين أو سلبيين .
وأظن إن ما ينفعش تبقى النفس براحتها بقالها سنين ,وفجاءه تقول لها لازم تكوني مثالية .. مستحيل .. إنت كده بتكرّهها إنها تمشي صح.
قوم واخلق الأهداف وجزأها مهمات , وكل فترة تتخلص من عادة سلبية، كل يوم تنفذ مهمة جديدة فى أهدافك, و كل يوم تكتب نعمتين تلاتة تشكر ربنا عليها
(فبداية قبول النقص هو شعورك بفضل الله عليك).

ودايماً بحب أكرر عليك , رحلة التغيير للفكر دى #مش_سهلة_لكن_مستاهلة ومحتاجة منك مجهود وكبير, لأنك بتغير برمجة سلبية عشت فيها كتير, بس صدقني التجربة حلوة.
و أخيرا أشوفكم مع نوع إدمان جديد معظمنا مدمنينه وبنتعامل معاه بمعانى كتيرة كلها بعيدة عن معنى الإدمان, فتايهين في دوامة مش عارفين نخرج منها لأننا مش حاطين ايدينا على السبب الحقيقي.
#لسه_في_فرصة_للتعافي_من_الإدمان_بس_اديها_لنفسك
#سلام_عليكم
#امال_عطيه من كتاب #حب_نفسك الجلسة التالتة.

© HUD Systems 2018