#صرخة_علها_تجد_من_يسمعها

Amaal Attiah Amaal Attiah
مقالة Relationship Coaching تاريخ النشر : 1 month ago

صرخة مسكوت عنها انتشرت من معطيات العصر و الإستسلام لصراع الفتن, صرخة نابعة من كل أنثى تتمنى إطلاقها ولكن أنّى لها ذلك, صرخة مليئة بمعاناة مكتومة تحت سقف
(ما يصحش تتكلمي في الموضوع ده بالطريقة دى), (أو إزاى تقولى كده).
صرخة مفادها كفاية إهمال لإحتياجاتنا اللى بتشبعنا عاطفيا وعدم إدارتها والتفاهم معاها، بحجة الضغوط، ومفيش وقت، واحنا كبرنا على كده، او مافيش حل غير كدة،
لأن التجاهل والسكوت نتج عنه كارثة إسمها ( خيانة المرأة)، و الموضوع للأسف مابقاش يقتصر على طبقة معينة اومستوى فكري معين.
و طبعا الصرخة دى مش مقصود بيها تبرير للأمر أبدا، ولكن لتشخيص الحالة و دراسة أسبابها و إيجاد حلول عملية ليها, للحد من وقوع كارثة حقيقية على الجاني والمجنى عليه.

أما اللى في رأيه عدم توضيح الأمر ويفضل مسكوت عنه أحسن, فده بيخلي ستات تتهاون بالخضوع بالقول أو التمادي معاها في الحديث من باب إنها مستبعدة نفسها عن الفتنة دى ،
ولكن للاسف بيخدها التيار من غير ما تحس لانها مافهمتش نفسها والتدرج بتاعها لما تعوز حاجة,
ما مسكتش بداية الفكرة وقطعتها ولكن استرسلت فيها فلقت نفسها في الغريق في بركة مالهاش نهاية غير كره الذات واحتقارها لأبعد حدود.

ومحدش يقولى مالرجال بيخونوا ما بنسمعش كل الكلام ده ليه؟
وده لانى زى مابقول كل مرة أنت كل المجتمع انت السكن والتربية والحضن والطهارة ولو كل ده ضاع يبقى كل المجتمع ضاع.

بداية حابة أعرض الأسباب العامة اللى ممكن تعرض ست لكده من باب التشخيص والإدراك وليس التبرير أبدا (بكرر مرة تانية):-

• بسبب إحتياجات عاطفية محرومة منها وعبرت عنها مئة مرة بطريقة مباشرة أو غير مباشرة, أو ماعرفتش تعبر عنها, او مشيت بمبدأ الاهتمام مابيطلبش,
فبدأ يحصل شرخ فى العلاقة بينها وبين زوجها كل يوم يكبر عن اللى قبله. لحد ما فى يوم لقت كلمة حلوة اهتمام معين حتى ولو سؤال مالك؟ فبدأت تسترسل في التفكير والباقي بعد كده معروف.
• بسبب فرق إجتماعي او فكري أو الإتنين سوا وما تمش التعامل معاه بحكمة سواء من الزوج او الزوجة, فبدأت الزوجة تحتقر الزوج ويقل في عينها, فتبدأ تدور على الصورة دى في رجال كتير حواليها والباقى معروف.
• بسبب الضغوط النفسية الرهيبة اللى بتتعرض لها , وما تمش إدراتها بشكل سليم, فأول كلمة حلوة سَكِنت ألم الضغوط دى بتسمع لها, وتبقى هي الملاذ الآمن لصاحبة الضغوط.
• اهمال الزوج الشديد وتجاهل كل المحاولات اللى بتحاولها الزوجة لفلت انتباهه, ممكن يخلق مبرر للخيانة جوا نفسها, او مسكن لضميرها لما تلاقي الرجل اللى يديها اول كلمة اهتمام.
• الاستسلام للهوى وغياب مراقبة الله وتوطيد الصلة بيه, و عدم تدريب النفس على الصبر على المكاره اللى من ضمنها الحرمان العاطفي الشديد اللى للاسف 90% من البيوت تفاؤلا بتعاني منه.
والسبب ده في رايّ هو السبب الرئيسي اللى بتتبني عليه كل الأسباب السابقة.

الأسباب دى ممكن تكون مجتمعة أو منفردة ولكن جميع الحالات أكدوا إن الحكاية بدأت معاها بكلمة وهي ما كانتش عايزة أكتر من كده
وما كنتش متخيلة انها ممكن تخرج او تطول فى المكالمات او تحب الشخص ده بالشكل ده, وده شئ طبيعي جدا جدا ونتيجة لتتبع خطوات الشيطان, والإستهانه بمقدمات ممكن ترمينا في بئر مالوش قرار.

وهنا طبعا بنتكلم عن السيدات الطبيعيين اللى معندوهومش اى سمات سيكوباتية اوميول للخيانة او اضطربات شخصية ،لان دول حالات تانية ومحتاجين متخصصين.
تعملى ايه لو وقعتى فى الفخ ده؟
اولا أنا مدركة جدا الصراع الداخلي الدموي اللى جواكي , صراع ما بين فرحتك بالاهتمام الجديد او مشاعر الحب المزيفة اللى حساها, وبين كرهك واحتقارك لنفسك.
وطبعا مش هتكلم معاكي في حلال وحرام لانك اكيد مش محتاجة تسمعي كلام انت عارفاه.

• مبدئيا لازم تكوني موقنة تمام اليقين ان الراجل اللى بيسمح لنفسه يستحل حرمات غيره, وما يفكرش لحظة انه يحط نفسه مكان اللى استحل حرمته ده,
هو شخص مقامه الحقيقي تحت الاقدام, ازاى تقربيه منك بالشكل ده وتأمني له وتسمحي له يخترق سمعك وقلبك وروحك بالشكل ده ازاى؟
سؤال مهم لازم تكرريه على نفسك كل يوم مهما حلف وافترضنا صدق حلفانه انه بيتنفسك .
• لازم تعرفي ان الدنيا مش كلام حلو بس, حقيقي هو جزء مهم جدا لينا, ولكن في حاجات كتير وانجازات محتاجة تحطيها بالتوازى مع المشاعر اللى نفسك تحسي بيها,
حاجات وانجازات لو اديتها أهمية هتشبع روحك وتجمل صورتك في عينيكى وتديك الطاقة اللى انت مفتقداها بحرمانك من الاهتمام.
• قاومي الألم اللى حاسة بيه من حرمانك ده على اد ما تقدرى واحسن طريقة للمقاومة هو إشغال نفسك وانك ما تركزيش كل تفكريك طول النهار فى النقطة دى.
• اقرأى كتير عن سيرة الصحابيات اللى اتحرموا من رجالهم في عز شبابهم, واقعدى كتير مع سيدات ربت وكبرت رجال وهى فاقدة الرجل, او موجود وزى قلته.
• لازم تعرفي أن العلاج بالفكرة وتغيير المفاهيم اللى جواكي هو الملاذ الحقيقي ليكى علشان تخرجي من غياهب الجب اللى وقعتى فيها.

أما الصرخة التالية هأوجهها للرجال صرخة لابد أن يسمعها الرجال مهما أبت نفوسهم لأنها أصبحت واقع أليم .
• على فكرة الستات نفسها تتحب وتتحس وتسمع كلام حلو وانت ولا انت هنا وشايف ان دى تفاهات.
• على فكرة الست من حقها تبص لك تتبسط وتلاقي فيك النظافة والشكل المهندم والجسم الحلو , لانها دلوقتى بقى يتعرض عليها صور لرجال كتير بتشكل عنها مقاييس جديدة للإختيار في عقلها اللاوعي , زيك بالضبط.
• على فكرة بردوا الست نفسها تبقى متجدد وقعدتك يكون فيها ضحك وكلام عنها , مش بس زعيق ونكد.
• على فكرة الست بردوا حاسة بملل ويمكن أكتر منك لانها كتلة عواطف , بمعنى لو ما شبعتش عواطف بتقى مش عارفة تعيش بالمعنى الحرفي للكلمة.
• على فكرة الست مش مهيأة تكون سبع رجالة في بعض وانت حاطط اعصابك في تلاجة وشايف انها مابتعملش حاجة .
• على فكرة بردوا للأسف الشديد دلوقتى الست بتلاقي راجل تسمع منه كلام كويس , قاصد مش قاصد , لكن ممكن تقع في فخ الخيانة , أقل شئ الخيانة الفكرية, ومن غير ما تكون واخدة بالها.

أتمنى يكون المقال نقطة تحول في حياتكم واشوفكم في مقال جديد مقال يخلينا سند لبعض في دنيا مليانة بالأعباء.
#سلام_عليكم
#امال_عطيه

© HUD Systems 2018