#من_وحي_الجلسات

Marwa Morsi Marwa Morsi
مقالة Parenting Coaching تاريخ النشر : 1 week ago

#من_وحي_الجلسات

هو شاب ملتزم ومجتهد مازال طالب في الجامعة بيشتغل وعنده فكرة مشروع خاص خاطب وبيحضر للزواج بعد التخرج ... مشكلته إنه مفيش شغف ... مفيش طاقة.... مفيش روح....
بنرتب الدنيا وبنوجد الحافز وبنحط خطة عشان ينفذها....
بتمر اسابيع وشهور جميلة ونرجع تاني لنفس النقطة إيه السبب ... نسينا الحافز والهدف ....
طيب نكبره ونحطه قدام عنينا باستمرار عشان الحافز يفضل موجود.....
أساس المشكلة إن الاب والام راسمين خط زمني لكل حاجة وهو متمرد داخلياً عن إنه يمشي علي الخط دة فبقي الهدف مخالفة اللي بيقولوه وبس ..... لأنه متعودش من صغره علي الاختيار .....

هي شابة متخرجة وبتشتغل في وظيفة كويسة مشكلتها ثقتها في نفسها ضعيفة ... غير مبادرة وبتخاف تجرب أي حاجة جديدة ألا تغلط ....
بنحط ايدينا علي اساس المشكلة وبنحط خطة وبنبدأ في تنفيذها .... بترجع وهي مش قادرة ... الخوف مسيطر ومش قادرة تتحرك....محدش حيقدر يساعدها غير قوتها وارادتها انها تغير الوضع الحالي....
أساس المشكل اتربت علي اللي نعرفه أحسن من اللي منعرفوش ... وامشي جنب الحيط ...والبنت ملهاش الا بيتها وجوزها ....فالتجربة بالنسبة لها مخيفة عشان كدة بتعافر تكسر خوفها......

هو شاب من وجهة نظره إتأخر علي الجواز .... إختياراته في شريكة الحياة غير منطقية لعدم وضوح الهدف وعدم وضوح هو عايز ايه بالظبط لانه عايز يتجوز وخلاص عشان السن...مفيش هوية واضحة لأن الهدف غير واضح .....
بنحط خطة وترتيب وجوانب المفروض نشتغل عليها ......وبيختفي ..
أساس المشكلة غياب دور الاب وعدم الثقة بالنفس واهتزاز الصورة الذاتية لشخصه ...

هو شاب قمة في الوسامة والذوق والاخلاق والادب .... بيشتغل وظيفة كويسة.... مفيش حاجة ليها معني كل الحياة بالنسبة له شبه بعض .... أزمة ثقة في النفس .... تهويل لبعض الامور بشكل زايد عن الحد ....ضياع الهوية والهدف والشغف والحافز.....
أساس المشكلة حرص الاهل الزايد وعدم تدريبه علي تحمل المسئولية وعدم مشاركته في العيلة بدور فعال......

#الخلاصة
الكوتش مش ساحر ولا حيغيرلك حياتك بالعصا السحرية لو انت مشتغلتش علي نفسك كويس....وتحملت مسئوليتك الشخصية قدام كل العيوب والاخطاء اللي في حياتك .....
التربية ....التربية ....التربية.... أساس مشاكل كتير هو طريقة تربية غلط ... حماية زيادة ... غلط في المفاهيم ...رسايل بتوصل لولادنا بشكل خاطئ....
لو إنتي أم أو أب .....اتعلموا طرق تربية مناسبة للوضع الحالي......استثمروا في شخصيات ولادكم مش في اي حاجة تانية ....
رتبوا نفسكم صح واتعرفوا علي سيكولوجية ولادكم وهما بيفكرو ازاي.....سيبوهم يحلموا ويجربوا......
لكل شاب عِيد ترتيب نفسك .... اشتغل علي حالك بكل طاقتك ..... لسة فيه سنين كتير جاية محتاج انك تعيشها مترتب سعيد متزن .....متحكم في زمام أمور حياتك ......
وللحديث بقية من وحي الجلسات....
#الكوتشينج_مش_سحر
#التربية_وسنينها
#بنت_مرسي

© HUD Systems 2018