فى العلاقات

Marwa Morsi Marwa Morsi
مقالة Relationship Coaching تاريخ النشر : 1 week ago

#نركز_شوية
مشهد(1)
هو قاعد ماسك الموبايل وانتي جاية من المطبخ بتكلميه .. مبيردش .. بتتنرفزي ...
استني بس ..
هو مش سامعك حرفياً مش سامعك ... مش عشان اللي في ايده اهم لكن هو كراجل تركيزه في شئ واحد ... هو احادي التفكير موضوع واحد .. اهدي .. واستني اما يفصل عن اللي بيعمله وكلميه..
مشهد(2)
راجع من الشغل مكشر وانتي جميلة وقصة شعرك وعاملة نيولوك .. هو مش شايف .. هو جعان وبس ...جعان يعني فيه هرمونات في جسمه افرازها غير طبيعي .. يعني مفيش تركيز ...
هو مش مش مهتم .. هو مش شايف حرفياً ... ياكل ويشبع .. متقلبيش بوزك ... حياخد باله بعد ما يشبع ...
مشهد(3)
سرحان وساكت.... بتكلميه .. بيقولك سبيني لوحدي شوية ... مش ضروري يكون بيفكر في واحدة ... اكيد مش حيعمل كدة قدامك ...هو في مساحته الشخصية دلوقتي ... مش شرط تعرفيها في وقتها ... مش شرط تعرفيها خالص ...
اديله مساحته .. استني ... وارد يجيلك يحكي ويقول ... متقلبيش بوزك ... مش شرط تعرفي كل حاجة بيفكر فيها في نفس الوقت ..
———————————————————-
مشهد(1)
هي كانت بتتكلم معاك عادي وانت بتتكلم وفجاة وشها اتغير .. انت قلت كلمة وجعتها .. خنقتها ..
متقلبش بوزك ... اسالها وفهمها .. اشرح .. ومتقلبش التربيزة انها غبية وبتفهم غلط...
مشهد(2)
بتسالها انتي محتاجة حاجة ... بتقول لا .. بتاكد عليها وبتقول لا ... بعد كدة بتكتشف انها فعلا كانت محتاجة حاجة ومعرفتش تقول ... حاول معاها وساعدها علمها تطلب ... علمها تعبر عن احتياجاتها ... متقولهاش اتفلقي مدام مطلبتيش حاعرف منين ..
مشهد(3)
بتسالك هو انت بجد بتحبني ... اعرف انها محتاجة تسمع .. متقولش ايه السؤال السخيف دة اكيد طبعا ... اتكلم بحنية واحتواء واهتمام ... اعرف انها عارفة ومتاكدة انك بتحبها بس عايزة تسمع وتسمع ... خليك قريب من مشاعرها وخاطب مشاعرها صح...
————————————————-
في الجلسات اللي بتجيلي ... بتبقي المشكلة ان مفيش حلقة وصل ... مفيش نقطة التقاء ...
اتنين كويسين جدا ... لكن مهارات التواصل بينهم معدومة ...
احنا محتاجين نفهم سيكولوجية كل نوع ..
محتاجين نفهم احتياج كل طرف ... ونبني منطقة بايدينا مناسبة لشخصيتنا وتركيبتنا وافكارنا وطباعنا ... منطقة بنلتقي فيها بمنتهي وعي وحب وتفاهم ... منطقة بتلبي احتياجتي كإمراة واحتياجاتك كرجل ...
من غير ما نحس اننا بنتنازل او نحسس كل واحد بالمنّ علي التاني مقابل المجهود اللي بيتعمل ...
العلاقة بين اي اتنين قايمة علي فهم احتياجات كل طرف وقدرة كل واحد علي تلبية الاحتياجات دي وادراك وقت التقصير ومساعدة كل طرف للتاني في وقت التقصير وانه يرجع يقوم بدوره بنفس الكفاءة ....
العلاقة بين الرجل والمرأة من أروع ما يمكن بس لو نركز شوية ...
#بنت_مرسي

© HUD Systems 2018