#الأضلاع_الثلاثة

Marwa Morsi Marwa Morsi
مقالة Relationship Coaching تاريخ النشر : 10 months ago

#الأضلاع_الثلاثة
جوانب حياتنا الأساسية ترتكز على ثلاث أضلاع لا غنى عنهم ....
الجانب الجسدي والصحي ...الجانب العملى والاجتماعى ...و أخيراً الجانب النفسي والعقلي....🔺

بنلاحظ إننا بنهتم جداً بالجانب العملى والإجتماعى من حيث شغلنا ومركزنا الوظيفي اللى بيعتبر مصدر الدخل المادى لينا فى حياتنا ....
وكمان بنهتم بالشكل الاجتماعى من حيث الزواج والارتباط وكل تفاصيل شكل حياتنا الاجتماعية المعروفة ....
بنتفنن فى إننا ناخد كورسات وندرس وناخد شهادات ونطور من مهاراتنا العملية علشان نقدر نلاقي وظيفة مناسبة لينا ونحقق بيها رضانا
ومستوى الدخل اللى يوفر لينا حد أدنى من الأمان المادى اللى نقدر من خلاله إننا نلبي احتياجتنا الأساسية ....
وكمان بندقق أوى فى اختيار شريك الحياة وشكل ومكان الشقة اللي حعيش فيها والمستوى الإجتماعي المفروض أكون عليه وخطتى للسنين اللى جاية من استثمار ...
واولاد ومدارس ... وحاجات كتير جداً بنشغل بالنا بيها عشان وضعنا العملى والاجتماعى ...
وكمان فى وسط كل دة مش بننسي شكل جسمنا وصحتنا وبقينا بنعمل ريجيم وبنروح النادى والجيم عشان نعمل شكل مميز لجسمنا
وبقينا بنعرف ونفهم فى السعرات ونتابع كل الأنظمة الغذائية اللى ممكن تساعدنا فى صحة أفضل وشكل جسم أجمل...

وبسبب ثقافتنا بننسي الحالة النفسية والصحة العقلية لينا ...وطبعاً لأن كتير كانوا بيشوفوا إنها رفاهية أو شئ غير مهم وكمان مالوش أى لازمة....
بس اللى حصل السنين اللى فاتت أكد إن كل دة غير صحيح ...
الصحة النفسية من أهم الجوانب الرئيسية فى الحياة ...
وهى السبب فى نجاح وإتزان الجوانب الأخرى منها...
بدليل إننا بنلاقى ناس كتير محققين مستوى إجتماعى رائع ومركز مهنى مرموق إلا إنه بيشعر بعدم الإستقرار أو بيشعر بإن فيه حاجة غلط فى حياته ...
الحقيقة اللى مش بننتبه ليها هى صحتنا النفسية ...
مستوى إتزانا الفعلى ...طريقة إدراتنا لحياتنا ...مدى نجاح علاقتنا بكل اللى حوالينا .... سعادتنا ... نجاحنا ...
حقيقة كل الجوانب دى بتضح من مدى إهتمامنا بصحتنا النفسية ...
بلاقى فى الجلسات ناس كتير حياتهم العملية مميزة والإجتماعية كمان ....لكن مستوي السعادة لا يرتفع للحد المطلوب ....

تقييمنا للجانب النفسي مهم جداً ولا يقل أهمية عن إهتمامنا بكل الجوانب التانية .... لأنه بمثابة الخريطة المحددة لشكل الحياة ومعيار مهم لتقييم حياتنا بشكل علمى واضح...
ياريت منبخلش على نفسنا بوقفة بسيطة ...نقيم فيها الوضع الحالى ...
لأن الحيرة والقلق والزهق المفاجئ اللى مش بنعرف نخرج منه ...عامل بالظبط زي ارتفاع درجة الحرارة فى حالة اصابتنا بانفلونزا ... مؤشر يجب أخذه فى الاعتبار....
لأننا لو تغاضينا عن الحالة وهى فى أولها بيبقي عواقبها على المدى البعيد غير مرضية لينا ...
وكالعادة إحنا مش بنتحرك غير فى حدوث الكارثة ...ومش متدربين على فكرة الوقاية ...وحماية نفسي من سوء الحالة لوضع بيبقي أصعب مما نتخيل ...

وبيبقي السؤال ..."هو ليه كل دة حصل ؟" ...أو بيبقي السؤال ..."إيه اللى وصل الوضع لكل دة؟"‼️
مفيش حاجة بتيجي فجأة ... بيبقي فيه مؤشرات ...إشارات...إنذارات ... بس إحنا اللى بنتغاضي عنها لأن الوضع مش بيبقي كارثي....
محتاجين نهتم بالجانب دة بشكل أكبر لأن كتير من مشاكل مجتمعنا الحالية أساسها إهمالنا للجانب دة بشكل كبير ...
عشان الثلاث أضلاع يبقوا فى حالة إتزان ...محتاجين نهتم بيهم بشكل متساوى...
#بنت_مرسي

© HUD Systems 2019