انا قوي ولا يمكن اكون ضعيف

Mai Shaaban Mai Shaaban
مقالة Life Coaching تاريخ النشر : 4 weeks ago

انا اسكندريه .... انا مش دمياط ولا يمكن اكون دمياط
انا خلاص فى اسوان بس مش هسمح لنفسي اكون فى اسوان
كلام غريب صح

تخيل انك انسان راكب قطر وبيعدي على كل المحافظات والبلاد
لما بتطلب بحر بتروح اسكندريه ولما بتطلب مشبك بتروح دمياط
ولما بتطلب شمس بتروح اسوان
عجبتك محافظه اسكندرية بيقولوا انها حلوه فقررت تسمي نفسك على اسمها
ومهما عديت على محافظات تانيه انت رافض انك موجود فى المحافظات دي
لانك مصمم انك اسكندريه وانك مش دمنهور ولا بنها
بس ممكن تبقى الغردقه او شرم الشيخ بيقولوا برضه عليهم حلوين
وكل ما تكون في محافظه من اللى بيقولوا عليها وحشه تقعد ترفض
فلا بتستمتع بمشبك دمياط ولا خشب طنطا ولا فطيرة راس البر لانك بتنكر انك هناك
كلام خزعبلي صح ؟

طب قول ورايا
انا قوي ...... انا مش ضعيف
انا حاسس بالعجز بس مش هقبل انى احس بيه
احنا كبنى ادمين بنعدي على كل المشاعر على مدار حياتنا
بنعدي بالضعف
بنعدى بالقوة والعجز والفرحه والراحه والتعب حسب المواقف ومعتقداتنا وافكارنا ناحيتها كل شعور وقتها بييجى برساله وهدف وتنبيه
فاحنا بنربط هويتنا بمشاعرنا ونقول انا قوي وهى مجرد محطه زى اسكندريه
وبنرفض اننا دلوقتى فى ضعف زى ما بنرفض اننا فى دمياط
وكوننا بنربط ونرفض وننكر ده مش هيغير اى حاجه فى حقيقه ان المشاعر دى موجوده زى ما مش هيغير فى حقيقه اننا فى المحافظات دى حتى لو مش عاجبانا والناس بتقول عليها وحشه
احنا احنا مهما عدينا بمحطات .....مشاعرنا هى مجرد حالات بنعدي فيها وبنسيبها

من اكبر الحاجات اللى بشوفها فى الجلسات و بتسبب مشاكل كبيره جدا جدا هى التمسك بشعور وربطه بالهويه وبجد لما بتعامل مع العملاء بيحسوا براحه كبيره بمجرد ما نغير المعتقدات دى بيحس بادميته وانه انسان

انت مش قوي انت انسان ساعات بتعدي بالقوة وساعات بتعدي بالضعف
انت مش ضعيف انت انسان ساعات بتعدي بالضعف وساعات بتعدي بالقوة

انت مش اى محافظه من دول ولا اي شعور من دول
انت فى اسكندريه وممكن تبقى فى دمياط ولما تكون فى اسوان هتسمح لنفسك انك تكون فيها لأنك فيها وانكارك مش هيغير حاجه
لما تقبل هتبتدي تشوف ايه الحلو فى اسوان وتستفيد منه وتخليه يطلعك لقدام
انت انت وبس.
#مي_شعبان

© HUD Systems 2018