أصل ولا صوره

Tarek Wafaa Tarek Wafaa
مقالة Life Coaching تاريخ النشر : 1 month ago

أصل ولا صوره

كلنا عندنا أمل إننا نكون أفضل وفي ظل سعينا للوصول للأفضل بيكون عندنا مثل أعلى أو قدوه بنبص عليه ونفسنا نكون زيه.
بس أوقات بنقع في فخ كبير جدا "إسمه المقارنه"

المقارنه اللي من وجهة نظري لازم تكون بين حاجتين مشتكرين في قدراتهم ومهاراتهم وخبراتهم و قيمهم وطبيعة شخصياتهم
عشان ببساطه مينفعش اقارن كيلومتر بكيلوجرام، بكل المقاييس المقارنه مستحيله، عشان مفيش إتنين في الدنيا مشتركين في القيم والخبرات والمهارات والقدرات وطبيعة شخصياتهم.
المقارنه بتضرنا بشكل كبير جدا" في كل الأحوال
يعني لو المقارنه مع حد إحنا شايفين قدراته أعلى مننا فاحنا بنخلق عندنا حاله من الإحباط والشعور بإننا لسه قدامنا كتير والمشوار طويل وإحنا فين وهو فين،
وبيصيبنا إحساس بعدم التقدير لخطواتنا البسيطه اللي مشيناها مقارنه بالعملاق اللي بنقارن نفسنا بيه فبالتالي ممكن نيأس ونقف ومنتحركش
ولو المقارنه بحد قدراته أقل مننا بنبتدي نحس إننا معديين وعملنا اللي مايعمل ومحدش قدنا،
وطبعا" ممكن نصاب بالغرور الناتج عن مقارنه غير واعيه وغير منصفه، وبالتالي إحساسنا بإننا وصلنا ممكن يخلينا نتراخى ونقلل سرعة خطواتنا.

انا بشبهها بسباق جري وبيتسابق فيه 3 متسابقين متساووين في القوة والسرعه
أول متسابق بيجري بتركيز شديد ومركز عينيه الإتنين على الطريق لدرجة إنه مش شايف اللي حواليه
وتاني متسابق بيجري ومركز على الطريق بعين واحده والعين التانيه على المنافسين
وتالت متسابق عينيه الإتنين على المنافسين لدرجة إنه مش شايف الطريق كويس
النتيجه إن اللي مركز بعينيه الإتنين هيوصل أول واحد
والتاني اللي مركز بعين وعينه التانيه على المنافس هيوصل تاني واحد
والتالت اللي مش مركز على الطريق خالص هيقع ويخسر السباق، بالرغم إن قدراتهم متساويه

لو عاوز تخرج من فخ المقارنات لازم تحدد أهدافك كويس وتعرف الوجهه النهائيه اللي عاوز توصلها فين بالظبط،
عشان لو مركز على غيرك ممكن تلاقي نفسك بعد فتره بتسعى لتحقيق هدف مش بتاعك ولا مناسب ليك ولا يتناسب مع إحتياجاتك
مش عيب إنك يكون عندك قدوه أو مثل أعلى بتتعلم منه، أو تتأثر بقصة نجاح ملهمه تدفعك لقدام، عشان كلنا بنتعلم من بعض،
لكن لازم تكون إنت، إنت بنسختك الأصليه اللي مفيش حد في العالم مشترك معاك فيها واللي الناس هتبصلها في يوم من الأيام وتتعلم منها
وخليك عارف ومتأكد إن قدوتك ومثلك الأعلى لو كان بص لغيره مكانش وصل للي إنت شايفه دلوقتي ولا كان هيستحق إنه يكون في المكانه اللي إنت شايفه عليها، ومش بعيد يكون وقع من أول السباق.

إنت أصل فمتقبلش تكون مجرد صوره.
#طارق_وفاء

© HUD Systems 2018