التحرش الجنسى

Fatma El Mahdy Fatma El Mahdy
مقالة Parenting Coaching تاريخ النشر : 3 weeks ago

متخيل..
إن التحرش مش فعل بس..ممكن يبقى لمسه..أو كلمة..
إن اللى بيتحرش بطفلك ممكن يكون من أقرب الناس ليك..
إن ابنك ممكن تعمله توعيه من 3 سنوات ..
..
إن الإبن الكبير ممكن يتحرش بالصغير..
إنك مينفعش تسيب ولادك فترات طويله مع بعض ولوحدهم..
إنك متسيبش إبنك فى أى مكان ومع أى حد ..
إن عمو تامر اللذوذ وطنط سها الحبوبه ممكن يكونوا اول الناس اللى بيتحرشوا بإبنك..

إن مش أى بيت يقعد فيه ومش أى بيت ممكن يبات فيه..
إن إبنك ممكن حد يتحرش بيه حتى لو عنده 3 سنين..
إن أنكل فلان وجدو علان لا ابنك ولا بنتك ينفع يقعدوا على رجلهم..
إن هات بوسه يا روحى.. ولازم تدى طنط حضن ملوش أى لازمه خصوصا لو ابنك مش عاوز..

إن مش أى حد ينفع يغير لإبنك..
إن حفلة الغيار بتاعة البامبرز وكل العيله عايشه حياتها وبتتفرج ده إسمه تهريج..
إنك لازم تتفق مع الحضانه ان مشرفه واحده بس هى اللى تغير لابنك وانت اللى تختارها وميبقاش كل من هب ودب بيدخل عليه..

إنك لازم تقوله يقفل على نفسه باب الحمام فى المدرسه كويس
إنه يفهم انك سنده وانت اللى بتوفرله الامان -بعد ربنا - ولازم يوصله انه لو حصله اى حاجه انت هتاخدله حقه..
إنه لو تم التحرش بيه فى المدرسه لازم يحكى ..ان شاء الله حتى للمدير نفسه لو ملقاش اى تفاعل من المدرسين..

إن تعليمه الثقه بنفسه أهم من كل شئ..
إن كلامك معاه ممكن يخليه معندوش ثقة بنفسه وبالتالى يبقى فريسه سهله جدا..

إن كلمات..فاشل..غبى ..قصير..ضعيف..عبيط..حمار..ولاعمرك هتفهم..أى حد ممكن يضحك عليك..اخوك اقوى منك ..
كلها كلمات بتساعد فى تكوين شخصيته قطعا..وبالتالى بتتهز ثقته بنفسه وبيكون هو الضحيه القادمه...
إنك ممكن تستبدلها بكلمات زى..انت هايل..شاطر..ممتاز..واثق منك..انت مسؤل..بقدر اعتمد عليك..انت فنان..انت متميز..شخصيتك قويه...جسمك قوى..بتقدر تدافع عن نفسك..لما بتكون مع اخوك الصغير بكون مطمن..

إن المتحرش مش بيفرق بين ولد وبنت ولا طفل كبير اوصغير.. ولا بيفرق كمان بين المحجبه او غير المحجبه..
إن ابنك ممكن يتم التحرش بيه فتره طويله وانت مش دريان..
انه ممكن يتعرض لتحرش قوى وميقولكش..عادى
انه ممكن حتى يقولك وانت متاخدش بالك او تصدق..

ان المتحرش ممكن يبتزه بأى حاجه عشان ميفضحوش..لازم تفهمه انه عادى ممكن يغلط ويصلح غلطه لان كلنا بشر..المهم ميسمحش لحد انه يبتزه..
ان الطفل بيكون حاسس بالذنب وفاكر ان هو السبب فى التحرش ...

انك لو بتغلط وتعتذرله ده بيعلمه انه ممكن يغلط وييجى يقولك
ان كلامنا عن تقديس الكبار وانهم مبيغلطوش كلام فارغ ..وبيخلى الطفل يفتكر ان عمو اللى اتحرش بيه مش غلط عشان كبير وانا اللى غلط عشان صغير..

انك لازم تعلمه ازاى يقول (لا) واول حد ممكن يعارضه هو انت ..
انه لو طبق (لا) معاك هيبقى سهل عليه يطبقها مع الغريب ..
إن حفلات الغيار الجماعى اللى بتحصل فى النوادى والتجمعات على مرأى ومسمع من الكبار مرفوضه تماما..

إن بنتك اللى عندها 10 الى 12 سنه من الافضل انها تلبس بنطلون تحت المايوه..حتى لو مبلغتش..
ان فيه بنات ممكن يكون جسمها كبير شويه بتطلع من البسين وتجرى ع الكابتن وتاخده بالحضن والاب بيكون ف منتهى الانشكاح باعتبار انها لسه صغيره ..
إن فيه بنات اجسامهم بتكون اكبر من سنهم ..متستناش لما تبلغ عشان تعلمها تغطى جسمها..

ان فيه نوادى لا تقبل غير بالمايوه قطعه واحده وترفض تماما اى بنطلون تحته حتى لو البنت او الولد بلغوا..لو وافقت يبقى لا تلومن الا نفسك
إن الحنة وحفلات البنات بقت أوفر فى اللبس اللى هو غالبا بيكون من غير لبس أوى.. معلش لازم نتحرى فيها حدود العورة.

إن فيه جد اتحرش بحفيدته..
إن أهلها مخدوش أى رد فعل عشان ده جدو..

إن الطفل بيشوفك بتسلم عادى ع المتحرش وتاخده بالحضن ..متخيل ده ممكن يعمل فيه ايه..
إن فيه مدرسين بيتحرشوا بالطلبه..
إن فيه مدرس اتحرش بتلميذته 5 سنين ولما قالت لمامتها ..باباها قالها متخليهاش تاخد معاه تانى... بس

إن الطفل ممكن يميز اللمسة البريئة من اللمسة الخبيثة ..
إن انت مش لازم تقوله لفظ تحرش..لكن ممكن تفهمه ان فيه كلمة او لمسة مش طبيعيه ..

إن ابنك مش لازم يتعرض للتحرش عشان يبقى اتعرض للايذاء الجنسى..هو ممكن يشوفه ف أى مشهد من غير ما تاخد بالك..
إن نسبة الكارتون اللى فيها إيحاءات جنسيه ومشاهد صريحه ..نسبة لا يستهان بها..

إن سيدات كتير اتعرضوا للتحرش فى الصغر واعترفوا انهم مكانوش بيحكوا لاهاليهم ..

للمرة الخمستلاف.. المتحرش هو أبعد ما يكون عن تصورك وأكتر واحد ممكن متشكش فيه..

إن الطفل اللى بيتعرض للتحرش بيفضل فاكر الحادثة بتفاصيلها ..صوت المتحرش..ريحته..ملمسه..إحساسه بالعجز..إشمئزازه..كل حاجه ممكن تتخيلها..فبلاش تستهين وتقول ان الايام هتنسيه..

إن فيه بنوته اتعرضت لتحرش قوى من قريبها ولما الأم حاولت تاخد موقف ..صديقاتها قالولها وايه المشكله كلنا حصلنا نفس الكلام واحنا صغيرين ..بكره تنسى!!
إن البنت دى عمرها ما هتنسى. بتاتا..ولو معالجتش حالتها ممكن ترفض الزواج..ولو اتجوزت حياتها ممكن تبقى جحيم...

إن الطفل لازم يشوف رد فعل قوى منك..يعنى لازم تاخدله حقه وفورا ..
إن فيه بنات بيتعرضوا للتحرش من اخواتهم الاكبر منهم..والأب بدل ما ياخد حق بنته ..بقى يضربها !!!

إن فيه أمهات بيستحموا مع ولادهم ..عادى..ويرجعوا يشتكوا ان ولادهم عندهم انحراف..

إن فيه اباء وامهات معندهومش حاجه اسمها خصوصية غرفة النوم ..وانت فاهم الباقى..

إن لحد لحظة كتابة البوست ده أهالى كتير معندهاش وعى بحدود العورة..وبيعيشوا حياتهم بيس همه وولادهم..بنات وصبيان ..

إنى كل ما اتكلم ف الموضوع ده ألاقى الناس بتقولى بلاش "أفوره"..
إننا مش شاطرين غير اننا نعيش ف دور "النعامه" ومبنعرفش نبقى "أسود "..

إن الناس فاكره ان التحرش فى أوروبا والدول المتقدمه فقط..
إننا فاكرين لسه اننا شعب متدين بطبعه ..
إن ناس كتير مش مصدقه ان فيه تحرش بالاطفال ولو صدقت ممكن تكبر دماغها..

إنك فاكر ان كل الناس محترمين وطيبين زى حضرتك..
إنى شبه متأكده انك هتقرا البوست ده أكتر من مره وممكن متصدقش..
إنك بدل ما تشكك او تخاف او تقلق ممكن ببساطه تبدأ توعى إبنك

إنى مش كاتبه الكلام ده عشان تضايق أو تقول الدنيا ملهاش أمان ..أنا كتبته عشان شفت حالات أطفال وسيدات كبار بالفعل اتعرضوا للتحرش وأهاليهم ميعرفوش عنهم أى حاجه.. كل اللى مطلوب منك انك تخلى بالك ..
من فضلك..أرجوك..إوعى تستهين بالكلام ده..
صحصح وفتح عينك.
إنتهى .
#فاطمة_المهدى

© HUD Systems 2018