لو مش لاقي شغفك .... مش هتلاقيه

Mai Shaaban Mai Shaaban
مقالة Career Coaching تاريخ النشر : 1 week ago

🔸مش لاقي شغفك الحقيقي ؟
🔸طب لاقيته وبعدين ساعات بتشك انه ممكن يكون مش شغفك ؟
🔸عاوز الحل ؟ عاوز تعرف ؟ عاوز توصل بقى وترتاح ؟

⚡احب ابشرك
مفيش حاجه اسمها شغف واحد حقيقي
يعني ايه الكلام ده ؟
عاوزين هنا نفرق بين حاجتين مهمين

⚡الشغف و⚡القيم و⚡الموهبه ⚡

◾الموهبه : او بمعني اصح نقاط قوتنا هي انى بعمل حاجه بسهوله اكتر من حد تاني
زى الرسم حد عنده قدر على التحكم فى ايده وتخيل وتطبيق التخيل ده ،
والتأليف حد عنده قدره على تجميع الكلمات بشكل معين يخدم الغرض منها ،
الشرح حد عنده قدره على تبسيط المعلومه لاى حد يقدر يستوعبها
دي حاجه بتكون من عند ربنا وبالمناسبه ممكن نتعلمها لو جبنا حد بيعمل الحاجه دى وابتدينا نعمله حاجه اسمها Modeling اننا نشوف ازاى بيعملها بسهوله كدا ونتعلم

◾القيم : هى البنزين اللى بيحركنا فى حياتنا ، هي اللى بتخلينا نعمل الحاجه واحنا مبسوطين ،هي الحاجات اللى بيبقى عاوزين نقرب لها ونبعد عن عكسها ،حاجات بيبقى قيمتها عندنا عاليه وليها معاني حلوه زى العطاء....الحب...الحريه ...النمو
فاي حاجه بتوصلني او بتوصل الناس للقيم اللى بحبها انا بحبها وبحب اعملها

◾الشغف :هو اننا بنعمل الحاجتين مع بعض بنستخدم نقط قوتنا علشان تحقق القيم اللى بتحركنا وتحفزنا ....هو اننا بنعمل الخلطه بتاعتنا اللى مش عند حد علشان نطلع حاجه تخدم الحاجات اللى مؤمنين باهميتها

لو مسكنا مجال واحد زى الموسيقى ناس بتحب قياده الاوركسترا ....ناس بتحب تعزف...ناس بتحب تعلم ...ناس بتحب تسمع وتتذوق... كل واحد عنده دافع وقيمه لاختياره

والدليل ان مكانش زمان فى حاجه اسمها كوتشنج ولا موبايلات ولا ماركتنج ولا دوبلاج ولا كارتون من الحاجات اللى بيقولوا عليها شغف اليومين دول
فكانت نقاط القوه دى بتتوظف فى حاجات تانيه تخدم نفس القيم اللى بيحبوها

🔸 من ضمن نقط قوتي حب الكتابه وحب تبسيط الحاجه الصعبه ، فكنت شاطره جدا فى الرياضه وبجيب فيها الدرجه النهائيه وبحل اصعب مسائل....... بس لا حل المسائل دي ، ولا التدريس كان بيمثل قيمه مهمه عندي
لكن فى الكوتشينج لقيت نفس الكلام مشكله مكلكعه وبفككها واحده واحده لحد ما نوصل للنقط المهمه ونشتغل عليها وكمان بكتب مقالات هنا ، و ده بيحقق لى قيمه مهمه اووووى عندي وهى العطاء فبقى شغفي

🔸يعني ايه الكلام ده ؟
💡يعنى ممكن جدا تشتغل بنقط قوتك وتبقى مش مبسوط وحاسس اللى بتعمله ملهوش قيمه بالنسبه لك ؛ زي ما كنت فى هندسه وحسيت ان ده مش مكاني
ممكن جدا لو كنت اشتغلت فى مكان اقدر ادي الناس؛ واساعدهم؛ واشرحلهم؛ وابسط الامور ؛ فى الهندسه برضه ؛ كنت مفكرتش ابدا اعمل شيفت للكاريير
زي صاحبتى اللى صوتها حلو جدا فى الغنا وده ينافي قيمها ؛ فلو نزلت اغاني مش هتبقى مبسوطه.

💡وممكن جدا تشتغل فى حاجه مبتعرفش تعملها بسهوله ومش نقطه قوة عندك بس تتعلمها وتنمو فيها وتبقى مبسوط لانها بتخدم قيمك وبتحقق شعور جواك بالنشوه
زى ما ناس بتتعلم النحت او الديكور

💡يعني شغفك ممكن متكونش مبسوط فيه لو بعد فتره بدأت تنسي القيم اللى بدأت بسببها واتحول لمجرد بيزنس وفيه ضغوط ومشاكل وتعب اعصاب

🔹الشغف الحقيقي هو الخلطه اللى يكون فيها قيمنا العليا وبنعرف نعملها وبنفتكر دايما احنا هنا ليه ؟
🔹الشغف الحقيقي هو نيتنا من اللى بنعمله انه يكون عندنا big why بتحركنا وتدفعنا نتطور وننمو علشان كده ممكن يكون حد شغفه تربيه ولاده وولاد الناس التانيه ، واحده شغفها تنضيف بيتها وترتيبه ، وواحد شغفه انه يطبخ للناس بس اهله لأ ، واحد شغفه تبسيط العلوم الحياتيه للكبار وتاني تبسيط العلوم العلميه للأطفال
وبعد شويه ده يتغير ويبقى شغفهم حاجات تانيه خالص
وما اكبر المبالغات والتخيلات اللي بتتبني تحت اسم الشغف
🔹مفيش حاجه اسمها شغف حقيقي لقيته ومسكت فيه وخلصنا
ولا خوف انه ميطلعش شغفي واكون ضيعت وقتى
🔹الشغف خلطه احنا اللى بنتحكم فى مكوناتها وبنغذيها وبنغيرها

⚡احنا مبنلاقيهوش احنا بنصنعه ⚡

© HUD Systems 2018