لتعارفوا

Sara Soliman Sara Soliman
مقالة Relationship Coaching تاريخ النشر : 2 weeks ago

امبارح اتفقت مع الستات من تشيلي والبرازيل والمكسيك اني اقعد معاهم استجوبهم بما انهم بالنسبة لشبابنا النهاردة كاسرين ارقام فلكية في عمر الجواز، ٢٥ سنة و ٢٧ سنة و٣٥ سنة جواز..
هو دا ملخص لقاء اللاتينوز...
اولا وقبل كل شيء احترمت جدا فكرة انهم بيحضروا في الكنيسة كورس توعية عن الجواز زمان كان يوم واحد، النهاردة بقى يومين.
ممكن القسيس يدرسلهم ويجيبوا كمان ناس بقالهم سنين كتير متزوجين يحكوا تجربتهم عشان ينقلوها للشباب...كنوع من الmodeling للخبرة..

تاني حاجة كل واحدة عملت لنفسها دستور حياة ينفع تمشي عليه عشان تحافظ على الجواز ده مهما حصل، ولاقيت في منها حاجات انا دايما باقولها وسط كلامي:

- احنا بنخرج سوا كزوج وزوجة من اول يوم جواز ومن ساعة ما الاولا اتولدوا.
كل حاجة لها وقتها، البيت له وقت والاولاد لهم وقت واحنا لينا وقت نستمتع فيه ببعض ده بيخلينا دايما قريبين.
- لازم كل واحد فينا يقدم a personal compromise ..احنا مانقدرش نغير غيرنا احنا نقدر نغير نفسنا، بالتالي باتكيف مع الوضع واشوف هاقدر اتغير في ايه عشان الدنيا تستمر.
-الجواز ده "مشروع مدى الحياة" ومش وارد انه ينتهي... (انا انبهرت من المعنى ده تحديدا).
احنا هنفضل نشتغل عليه دايما مهما حصل لانه مكمل معانا على طول وهنحط فيه كل جهدنا عشان يستمر... (فكرة قدسية الجواز الي انا باتكلم عنها في الكورس، تخلي الواحد غصب عنه مضطر يشتغل عليه ويصلحه ).
-التربية على المسؤلية فينا من اهالينا، من واحنا صغيرين بنعرف نعتمد على نفسنا ونخطط لنفسنا ونحط اهداف نشتغل عليها ونتعلق بيها لحد ماتحصل...
- سعادتي دي مسؤليتي مش مسؤلية جوزي..انا الي اعرف ابسط نفسي (الله عليكو)..
-عندنا دايرة الصحاب دول مهمين جدا بنخرج ونحافظ على الخروجات والمواعيد دي عشان دي احسن طريقة نفك بيها عن نفسنا.
واحدة فيهم عندها دايرة اصحاب وواحدة تانية عندها ٤ دواير محافظة عليهم. دول دورهم انها تفك معاهم، تروق بالها معاهم عشان مع جوزها يكون وقت fun مش شكوى ولا يحللي مشاكلي...وقت حب ودلع بس..
انا بالنسبة لي شايفة ان حاجات كتير ممكن تحل محل الدواير دي، ممكن تبقى قرايب مقربين، او هواية او رياضة او شغل، تروق بالها بيه وتفك بيه من مشاكل الدنيا...

ده كان ملخص لقاء اللاتينيات..
عايزة اقولكم اني استفدت منهم وفهمت اد ايه التركيز في المشروع ده بتفاصيله مهم جدا وغايب جدا عن مجتمعنا النهاردة..
ولازلت مصرة ان المصرية بتتربى انها تبقى ام مش انها تبقى زوجة، وده عيب كبير.
المجتمع اللاتيني يعتبر محافظ ويعتبر متدين...
بيركزوا في تعليم اولادهم مبادئ مهمة في الحياة...للاسف احنا بنقعد ناخد من الغرب كل extremes من غير حكمة ولا تنقيح..

يارب يكون الكلام ده افادكم...
فتكم بعافية
#سارة_سليمان
#لتعارفوا

© HUD Systems 2018