المكافأة الاخيرة

Ereeny Mourad Ereeny Mourad
مقالة Parenting Coaching تاريخ النشر : 6 months ago

"هؤلاء الصغار قد يعطلون مسيرتي المهنية، لكنهم يربطونني بثبات بنفسي و بالله القدير و بالحاضر و بالابد...هؤلاء الابناء الذين يتلوون قد استحوذوا علىٍ في لحظة وجيزة، لكنهم جذبوني في النهاية نحو السلام الذي كنت ابحث عنه قبلا باستماتة" إيريس كراسناو
لما قريت المقولة دي خبطت جوايا في احساس دفين دايما عندي ناحية ولادي..انهم مصدر معطل لي!!
بحبهم جدا لكن متعطلة عن شغلي و مسيرتي و مشواري..عن مظهري و شكلي..عن احساسي بنفسي..اهتمامي بصحتي..عن رغبات كتيرة جدا و حاجات كتير كنت بحب اعملها قبلهم!

كتير كنت بشوف ان عملية التربية عملية شاقة و الاب و الام مبيطلعوش منها بحاجة غير بذكريات لطيفة لاني اؤمن بأن اطفالنا هم ملك للحياة لكن احنا فقط اؤتمنا عليهم...
لكن لما بدأت اعترف بإحساسي الدفين دا اللي دايما مخليني متسربعة في كل وقت بقضيه مع ولادي لحد ما يناموا عشان ابدأ انجز..
او مضايقتي اني مبقتش عارفه اخرج براحتي و اصحى براحتي..
و كل الرفاهيات اللي اتحرمت منها..
ساعتها بس قررت ان اللي معطلني حقيقي هو شعوري ده مش ولادي!!
و ساعتها بدأت اهدأ و استمتع بوقتي معاهم..و اكدب اي فكرة جوايا بإنهم مصدر لتعطيلي او ان حياتي كانت افضل قبل ما يجوا..
و لما بدأت اهدأ بدأت كمان ادرك و افهم ان قصد الله من عملية التربية الشاقة دي مش ان ولادنا يطلعوا كويسين و اسوياء لأ..
انما ربنا شغال علينا و على ولادنا في نفس الوقت..

و لما ركزت لقيت ان انا بكتسب خلال رحلة تربيتي لاولادي حاجات كتيرة اوي زيِ زي ولادي بالظبط.. بكتسب نفس اطول..
قدراتي اللي حصلها مط شديد مكنتش متخيلة ابدا اني اقدر اقوم بكل ده قبل كده..
ادارة الوقت اللي خدت فيها تدريبات كتيرة لكن متعلمتهاش عمليا غير في وجودهم..
اكتشفت اهمية اني اتلامس يوميا مع الطفل الداخلي اللي جوايا عن طريق اللعب معاهم لان دا خلاني اكثر سواءا و استمتاعا بالحياة..
اكتسبت كتير..لكن اعتقد ان اهم من كل ده هو وقت استلام مكافاتي من الله شخصيا..اني اديت امانتي كاملة ناحية ولادي؟؟
اني عملت بوصيته ناحية اطعام الجعانين و سندة المحتاجين و تدفئة البردانين..لان كل دا بينطبق على ولادي كمان مش بس اللي برا بيتي..

الله مهتم بيا زي ما هو مهتم بولادي و عملية التربية شاقة جدا مقدرش انكر لكن فيها بيتم تدريبي انا و ولادي بإحتراف شديد و مكافأتها كتير و اهمهم يوم استلام المكافأة الاخيرة.

© HUD Systems 2019