للمنفصلين للمنفصلات

Marwa Morsi Marwa Morsi
مقالة Relationship Coaching تاريخ النشر : 2 months ago

#للمنفصلين_للمنفصلات
نملي قلوبنا بشوية رحمة.. وياريت نستوعب اللي بيحصل مع ولادنا...
انت مهما قلت لولادك سئ أمهم مش حيكرهوها... وانتي مهما قولتي لولادك سئ والدهم مش حيكرهوه...
ياريت نتوقف عن تفريغ الانتقام من بعضنا في الاطفال... الاولاد من حقهم يشوفوا صورة سوية سليمة للانفصال...
الطلاق من شرع الله ولكن شكله السئ الحالي مدمر .....الا من رحم ربي...
ليه منوصلش بالولاد انهم يقولوا.. ماما كويسة اوي وبابا كويس اوي ياتري ايه اللي خلاهم ميكملوش...
نزرع في دماغهم وعي واستيعاب... ونفهمهم ان فيه مقومات لاستمرار العلاقة الزوجية... عشان بدل ما يرفضوا الجواز من الاساس... يستوعبوا انهم محتاجين يعلوا وعيهم... محتاجين معايير صحيحة للاختيار...
محاولاتكم لجذب الاولاد لطرف حد فيكم محاولات فاشلة ميئوس منها حتي ولو بدت في الظاهر انها ناجحة...
كتير من الاولاد بيلجأوا لارضاء الام بكلام انك الاقرب لينا في حين بيقولوا للاب نفس الكلام... سيحاسبكم الله علي العذاب اللي انتوا بتسببوه لولادكم دة...
لازم تفهمى ان معاييرك ليه كزوج وانه قصر معاكي من وجهة نظرك مالوش علاقة بدوره كأب حتي ولو كان مقصر معاهم...
ونفس الشئ للام...
الاولاد مش بيتعاملوا معاكم من منطلق التقصير والواجب والحقوق...
الاولاد بيتعاملوا معاكم من منطلق المشاعر والتواجد والعطاء الروحي... بيتعاملوا من منطلق الانسانية البحتة ودة مالوش اي علاقة بمعاييرنا وقوانينا اللي احنا اقمناها ورتبنا عليها المحاكم والقرارات والانفعالات اللي بنعيشها...
الخلاصة... طلعوا ولادكم من معادلة الانتقام... من معادلة الغل... من معادلة المكسب والخسارة...
ولادكم محتاجين يشوفوا دور الاب ودور الام... حتي لو مش عايشين في بيت واحد...
الادوار يمكن القيام بها بكل الطرق منها جودة الوقت... جودة الدور.... ساعة واحدة مع ولادك ممكن تاثر عليهم شهر كامل لو عملتها صح... لو قدرت تلبي احتياجاتهم بشكل سليم وسوي...
انتو اختارتوا غلط او مقدرتوش تكملوا لاي سبب.... نفصل كل دة علي جنب ونركز ان فيه اطفال... فيه اشخاص بتتكون.... هدفنا حاجة واحدة بس....
أطفال أسوياء وبس... وربنا يبارك في اللي بينفذ الكلام دة...
اتقوا الله... لوجه الله.... يرحمكم الله...
#بنت_مرسي

© HUD Systems 2019